जनकपुर — मधेश प्रदेश सरकारका अधिकांश मन्त्रालय निमित्त सचिवकै भरमा चलेका छन् । प्रदेश सरकारको प्रमुख सचिव नै निमित्त रहेका मधेशका अधिकांश मन्त्रालयका सचिव पनि निमित्त नै छन् । 

मुख्यमन्त्री तथा मन्त्रिपरिषद्को कार्यालय र प्रदेश प्रमुखको कार्यालय पनि निमित्त सचिवकै भरमा चलेको छ । सह–सचिव रामकुमार महतो मधेश प्रदेश सरकारका निमित्त प्रमुख सचिव हुन् । अर्थ मन्त्रालयका सचिव रहेका महतोलाई निमित्त प्रदेश सचिवको समेत जिम्मेवारी तोकिएको छ । 

मधेश प्रदेशका तत्कालीन प्रमुख सचिव मदन भुजेलको गत कात्तिकमा सरुवा भएपछि निमित्त प्रमुख सचिवको जिम्मेवारी पाएका जयकुमार घिमिरेको पनि पुसको पहिलो साता सरुवा भयो । त्यसपछि यसैसाता महतोलाई निमित्त प्रमुख सचिवको जिम्मेवारी तोकिएको मुख्यमन्त्री तथा मन्त्रिपरिषद्को कार्यालयले जनाएको छ । 

मुख्यमन्त्री तथा मन्त्रिपरिषद्को कार्यालयमा सचिवलाई प्रमुख सचिव तोक्ने र चार सह–सचिवलाई सचिवको जिम्मेवारी दिने गरिएको छ । तर, मुख्यमन्त्री कार्यालयमा यमेन्द्र उपाध्याय मात्र प्रशासन महाशाखाको सचिवको जिम्मेवारीमा छन् । संघीय सरकारले प्रदेशमा सचिवलाई प्रमुख सचिव र सह–सचिवलाई सचिवको जिम्मेवारी तोक्ने गरेको छ । 

मधेश प्रदेश प्रमुखको कार्यालय भने निमित्त सचिवको भरमा चलेको धेरै भयो । प्रदेश प्रमुखको कार्यालयमा शत्रुधन यादव करिव दुई वर्षदेखि निमित्त सचिवको जिम्मेवारीमा छन् । गृह, सञ्चार तथा कानुन मन्त्रालयको जिम्मेवारी अहिले मुख्यमन्त्री कृष्णप्रसाद यादवले आफैंसँग राखेका छन् भने त्यो मन्त्रालयमा पनि निमित्त सचिव गणेश नायकलाई तोकिएको छ । गत कात्तिकमा सचिवबाट सरुवा भएका विमल रिजालको ठाउँमा गत कात्तिक २५ गते नायकलाई निमित्तको जिम्मेवारी तोकिएको थियो ।  

यस्तै, भौतिक पूर्वाधार तथा विकास मन्त्रालयमा पनि निमित्त सचिव नै छन् । मधेश प्रदेश सरकारको सबैभन्दा बढी बजेट करिब १६ अर्ब रुपैयाँ परिचालन गर्ने भौतिक पूर्वाधार तथा विकास मन्त्रालय हाल मन्त्रीविहीन मात्र होइन, निमित्त सचिवकै भरमा दुई वर्षदेखि चलिरहेको छ । हाल उक्त मन्त्रालयमा सञ्जयप्रसाद साहलाई निमित्त सचिवको जिम्मेवारी तोकिएको पनि दुई वर्ष पुगेको छ । मन्त्रालयको आधिकारिक वेबसाइटमा भने मन्त्री भनेर यसअघिका मुख्यमन्त्री सरोजकुमार यादव(महोत्तरी)कै तस्बिर र नाम अझै राखिएको छ । 

मधेश प्रदेश सरकारको ऊर्जा, सिँचाइ तथा खानेपानी मन्त्रालयमा पनि निमित्त सचिव नै छन् । उक्त मन्त्रालयको जिम्मेवारी निमित्त सचिव रामकुमार खंगले पनि दुई वर्षदेखि सम्हालिरहेका छन् । शिक्षा तथा संस्कृति मन्त्रालय पनि निमित्त सचिवकै भरमा चलेको दुई वर्षभन्दा बढी भएको छ । उक्त मन्त्रालयमा दीलिपकुमार ठाकुरलाई निमित्त सचिवको जिम्मेवारी तोकिएको छ । यस्तै, खेलकुद तथा समाजकल्याण मन्त्रालयमा पनि निमित्त सचिव नै छन् । उक्त मन्त्रालयको निमित्ति सचिवमा रंजितकुमार यादवलाई गत जेठमा ल्याइएको थियो ।