स्थानीयले दुई दिनअघि सशस्त्र प्रहरीको बेसक्याम्प अगाडि टायर बालेर प्रदर्शनसमेत गरेका थिए। जिल्ला प्रहरी प्रमुख, सशस्त्रका गणपति, राष्ट्रिय अनुसन्धानका उपनिर्देशकसहितको टोली सोमबार साँझ अनसनस्थल पुगेर स्थानीयलाई मनाउने प्रयास गरेको थियो। तर अनसनकारीहरू मानेनन्।

रामपुरखापस्थित सशस्त्र प्रहरी निरीक्षक मन्दिरा सुवालले स्थानीयको व्यवहारिक पक्ष हेरेर सहयोग गर्दै आएको बताइन्। ‘नाका नै खुला गर्न माथिको निर्देशन चाहिन्छ,’ उनले भनिन्, ‘हाम्रो तजबिजबाट सम्भव छैन। मैले स्थानीय जनप्रतिनिधिहरूसँग सबै कुरा राखेको छु।’ तस्कर हुने आरोपको उनले खण्डन गरिन्। ‘यो सरासर गलत आरोप हो,’ उनले थपिन्।

छोटी भन्सार सञ्चालनमा आएमा नेपाल–भारत सीमावर्ती क्षेत्रको व्यापार विस्तार, स्थानीय उत्पादनको बजारीकरण, रोजगारी सिर्जना र आर्थिक गतिविधि सशक्त हुने स्थानीयको भनाइ छ।

अहिले गौर बाहेकका छोटी भन्सारबाट चारपाङ्ग्रे सवारी नेपाल–भारत आवतजावतमा स्थानीय प्रशासनले रोक लगाएको छ। गत वर्ष यहाँका स्थानीयले विरोध प्रदर्शन गरेपछि चारपाङ्ग्रे सवारीलाई पारि जान–आउन छुट दिएको थियो। कोभिडपछि पूर्ण रूपमा बन्द गरिएको हो।

रामपुरखापमा रहेको छोटी भन्सार जनयुद्धकै समयमा हटाइसकिएको छ। यहाँ रहेको काठको भवन भत्काइसकिएको छ। अहिले सानो झुपडी बनाएर सुरक्षाकर्मीले सीमाक्षेत्रको नाकामा जाँच गर्दै आएका छन्।