नवलपरासीको त्रिवेणी भैंसालोटनस्थित नेपाल भारत सीमामा निर्मित ब्यारेजबाट भारतीय पक्षले नहरमा पानी छोड्ने गर्छ । भारतमै ९३ किमी यात्रा गरेर यो नहर पर्साको जगरनाथपुर गाउँपालिकाबाट नेपाल प्रवेश गर्छ । पर्सा,बारा र रौतहटमा गरी १५ ब्लकमा विभाजित गण्डक नहरको लम्बाइ नेपालतर्फ भने ८१ किलोमिटर रहेको छ । नेपालमा रौतहटको बागमती नदीमा मिसिएर यो नहर समाप्त हुन्छ ।

गण्डक सम्झौताबमोजिम भारतीय पक्षले गहुँ बालीका लागि नहरमा ८ सय ५० क्युसेक पानी दिनुपर्छ । सम्झौताअनुसारको पानी नआउने र भारतीय भूमिमै नहरमा नियमित मर्मत सम्भार अभावमा नहरको अन्तिम विन्दु अर्थात रौतहटको पूर्वी भेगसम्म नहरमा पानी पुग्दैन ।

नहरअन्तर्गत ३७ हजार ४ सय हेक्टर जग्गा सिञ्चित क्षेत्र रहेकोमा पर्सामा १६ हजार हेक्टर, बारामा ९ हजार हेक्टर र बाँकी रौतहटमा रहेको छ । पर्सा र बारामा लक्षित रूपमा सिँचाइ भए पनि रौतहटमा भने नहरको  पानी अपर्याप्त हुँदा लक्षित सिँचाइ हुन सक्दैन । भारतसँगको गण्डक सम्झौताअनुसार बर्सेनि धान बाली सिजनमा लागि असार १५ र गहुँ बालीका लागि पुस १५ मा भारतीय पक्षले नहरमा पानी दिनुपर्छ ।