राजविराज — सप्तरीको छिन्नमस्ता गाउँपालिका–५ सदा टोलमा दुई सातादेखि फैलिएको झाडापखालाका कारण एकै परिवारका दुई बालबालिकासहित तीन जनाको मृत्यु भएको छ । झाडापखालाले टोलका एक दर्जनभन्दा बढी स्थानीय प्रभावित छन् । 

तीन दिन लगातार पखाला लागेका स्थानीय बुचन सदाका एक वर्षीय छोरा संजीवको अघिल्लो बिहीबार मृत्यु भएको हो । संजीवसँगै बुचनका ६६ वर्षीय बुवा लक्ष्मण, २६ वर्षीया पत्नी पार्वतीदेवी र ४ वर्षीया छोरी राघिनी पनि पखालाले ग्रस्त रहेकाले गाउँकै क्लिनिकबाट औषधि ल्याएर खाइरहेका थिए । तर, पखाला भने रोकिएको थिएन । 

‘संजीव र पार्वतीलाई उपचारका लागि गजेन्द्रनारायण सिंह अस्पताल राजविराज पनि लग्यौं तर संजीवको उपचार सम्भव छैन भन्दै चिकित्सकले बाहिर लैजान भने,’ संजीवका काका देवनन्दन सदाले भने, ‘दाजु (बुचन) पञ्जावमा हुनुहुन्थ्यो, भाउजूका माइतीले लहान लगेर उपचार गर्छु भन्न थाले ।’ लहानतिर जाँदै गर्दा संजीवको बाटोमै मृत्यु भएको देवनन्दनले बताए । उनीहरू घर फर्किंदा देवनन्दनका बुवा लक्ष्मण पनि पखालाका कारण सिकिस्त भइसकेका थिए । गत आइतबार उनको पनि दुई–तीन पटक वाकवाकी आएर मृत्यु भएको हो । 

‘दाजुले पठाएको १० हजार र मेरा दुईवटा मोबाइल बेचेर पहिला नै भाउजू र भतिजोको उपचारमा खर्च भइसकेको थियो,’ उनले भने, ‘बुवाको नागरिकता पनि बन्धकी राखेर उठाएको पैसा पनि खर्च भइसकेकाले बुवाको उपचार गराउन सकिनँ ।’ लक्ष्मणको किरिया सुरु भएको एक साता नबित्दै पखाला लागेकी राघिनीको पनि गत शुक्रबार मृत्यु भएको हो ।_{सप्तरीको छिन्नमस्ता गाउँपालिका–५ सदा टोल । तस्बिरहरू : विद्यानन्द राम/कान्तिपुर}