गत वर्षजस्तो व्यापार अहिले नभए पनि धन तेरसको दिनदेखि व्यापार बढ्नेमा उनी आशावादी छन् । ‘अहिले फाट्टफुट्ट व्यापार भएको छ, तर धन तेरसको दिनदेखि व्यापार बढ्ने आशा छ,’ उनले भने, ‘बर्सेनि तिहार र छठ पर्वका बेला हाम्रो यस्तै दैनिकी हुन्छ ।’ 

छेउमै भेटिए अर्का किशोर कुम्हाले विकासकुमार प्रजापति । उनी पनि एक सातादेखि यहाँ माटाका भाँडाकुडा बेच्न बसेका छन् । बुवा शुभनारायण र भाइ ईश्वर पनि साथमै छन् । ‘यो हाम्रो पुर्ख्यौली पेसा हो,’ उनले भने, ‘वर्षभरि माटाका भाँडाकुडा बनाउँछौं, तिहार र छठ पर्वमा भने राम्रो व्यापार हुन्छ ।’

वीरगन्जमा यसरी तिहार र छठ पर्व लक्षित व्यापार गर्न आएका अधिकांश कुम्हाले पकाहामैनपुर गाउँपालिकाको सूर्याहाका छन् । त्यहाँ कुम्हालेको ठूलो बस्ती रहेको र उनीहरूले अझै पनि पुर्ख्यौली पेसा धानिरहेका छन् ।