जनकपुरधाम — जनमत पार्टीले मधेश प्रदेश सरकारलाई दिएको समर्थन फिर्ता लिएको पत्र मधेश प्रदेश सभामा पुगेको छ । मंगलबार संसदीय दलका नेता महेशप्रसाद यादवले सभामुख रामचन्द्र मण्डललाई सरकारबाट समर्थन फिर्ता लिएको पत्र बुझाएका छन् ।

गएको शनिबार पार्टीले सरकारमा रहेका मुख्यमन्त्री र मन्त्रीलाईसमेत फिर्ता बोलाउने निर्णय लिएको थियो । यादवले बुझाएको पत्र प्रदेश सभा सचिवालयमा दर्ता भइसकेको छ । दलका नेता यादवका अनुसार वर्तमान राजनीतिक परिस्थितिका कारण सरकारबाट बाहिरिने निर्णय गरिएको बताए ।

यसअघि जनमतले प्रदेश प्रमुख सुमित्रा सुवेदी भण्डारीलाई पनि विद्युतीय माध्यमबाट समर्थन फिर्ता,मुख्यमन्त्री र मन्त्रीहरू फिर्ता बोलाएको जानकारी दिइसकेको छ । जेन–जीको अगुवाईमा भएको आन्दोलन पछिको प्रदर्शन पछि मुख्यमन्त्री सतिशकुमार सिंहले पार्टीको निर्देशन अनुसार राजीनामा दिएका थिए । तर प्रदेशसभा विघटन नभएपछि उनले पुनः पद नछोड्ने अडान लिँदा जनमत पार्टीको आलोचना हुन थालेको थियो ।

जनमत पार्टीबाट मधेश सरकारमा मुख्यमन्त्रीमा सतिशकुमार सिंह, वन तथा वातावरणमन्त्रीमा सञ्जय यादव र उद्योग, वाणिज्य तथा पर्यटनमन्त्रीमा वसन्त कुशवाहा सहभागी थिए । जनमतले समर्थन फिर्ता लिएसँगै अब मधेश प्रदेशमा नयाँ सरकार गठनका लागि प्रदेश प्रमुखले आह्वान गर्नुपर्ने अवस्था आएको छ । ठूला दलहरू नेतृत्वको लागि आन्तरिक तयारीसमेत गरिरहेका छन् ।