मरहा नदीमा भारतीय पक्षले नेपाली बस्ती र भूभाग डुबान हुने गरी बाँध बनाउने प्रक्रिया अगाडि बढाएको हो ।
What you should know
महोत्तरी — नेपाली बस्ती डुबान हुनेगरी भारतीय पक्षले नदीको मुहान थुन्ने प्रक्रिया अगाडि बढाएको छ । नेपाल–भारत सिमानाअन्तर्गत महोत्तरीको सोनमा गाउँपालिका-३ रघुनाथपुर हुँदै बग्ने मरहा नदीमा भारतीय पक्षले नेपाली बस्ती र भूभाग डुबान हुने गरी बाँध बनाउने प्रक्रिया अगाडि बढाएको हो ।
रघुनाथपुरसँग जोडिएको भारत सीतामढी जिल्ला कन्हमा ग्राम पञ्चायत–८ भगवतीपुरस्थित मरहा नदीमा आउने बाढीको पानी थुनेर भारतीय पक्षले धान सिँचाइ गर्न दशगजा क्षेत्रमा २ किलोमिटर कुलो बनाउने प्रक्रियासमेत अगाडि बढाएको हो । नेपाली पक्षको अवरोधका बाबजुद भारत कन्हमाका सरपञ्च गिरेन्द्रकुमार सिंहको नेतृत्वमा स्थानीयहरूले डोजर, ट्याक्टर, कोदालो लिएर बाँध राख्न आउने गरेको स्थानीय बासिन्दाले बताएका छन् ।
नेपालबाट बगेर जाने मरहा नदी थुन्न १० फिटभन्दा अग्लो बाँध बनाएर दशगजा क्षेत्रमै कुलो बनाएर पानी कन्हमातर्फ लग्ने प्रक्रिया भारतीय पक्षले अगाडि बढाएको हो । बाँध निर्माणमा नेपाली पक्षले अवरोध गरेपछि भारतीय अधिकारीहरू सीमा क्षेत्रमा कुलो बनाउन सोमबार नापजाँच गरी फर्केका छन् ।
भारततर्फका सीओ मोनी कुमारीको नेतृत्वमा आएका कर्मचारी र सुरक्षा निकायले सोमबार मरहा नदीमा बाँध बाँधेर पूर्वतर्फ दशगजाबाटै कुलो बनाउने र बाँध राख्ने स्थानमा नापजाँच गरेको सीमा सुरक्षाका लागि खटिएका सशस्त्र प्रहरीले जनाएको छ ।
भारततर्फका अधिकारी र स्थानीय आएर दशगजा क्षेत्रमा डोजर लगाएर बाँध बनाउन खोजेको र अन्तर्राष्ट्रिय सीमा क्षेत्रमा कुनै पनि कार्य गर्न नमिल्ने भन्दै रोक लगाएको महोत्तरीका प्रमुख जिल्ला अधिकारी नारायणप्रसाद रिसालले बताए ।
‘एक साता अगाडिदेखि नै बाँध बनाउन खोजिएको हो,’ प्रजिअ रिसालले भने,‘जानकारी आउनासाथ भारतीय पक्षलाई सचेत गरायौँ । बाँध निर्माणले नेपाली भूभाग डुबानमा पर्ने भएकोले हामीले कुनै पनि गतिविधि नगर्न भनेका छौँ ।’ प्रजिअ रिसालले भारतीय पक्ष सीमा क्षेत्रमा बाँध नबनाउन सहमत भएको बताए । विगतमा भारतले सीमा क्षेत्रमा बाँध बनाउँदा सशस्त्र प्रहरीको बीओपी, रघुनाथपुर गाउँआसपासको भूभागमा बाढी बसेर क्षति गरेको थियो ।
