आइतबार जिल्ला अदालतमा पेस गरी अनुसन्धानका लागि तीन दिन म्याद थपिएको छ ।
पर्सा — संघीय सरकारका खानेपानीमन्त्री प्रदीप यादव र वीरगन्ज महानगरका प्रमुख राजेशमान सिंहलाई टेलिफोनबाट धम्की दिएको आरोपमा पक्राउ परेकी बारा कलैयाकी २३ वर्षीया किरण साह उपर तीनवटा अपराधसम्बन्धी कसुरमा मुद्दा चलाइएको छ ।
साइबर क्राइम गरेको, संघीय सांसदलाई ज्यान मार्ने धम्की दिएको र झुटा कुराको अफवाह फैलाएको अपराधमा मुद्दा चलाइएको हो । पर्सा प्रहरी प्रवक्ता डीएसपी किशोर लम्सालका अनुसार शनिबार वीरगन्जबाट पक्राउ परेकी साहलाई अदालतमा सोधपुछपछि आइतबार जिल्ला अदालतमा पेस गरिएको थियो । अदालतले अनुसन्धानका थप तीन दिन म्याद दिएको छ । यस अवधिमा यस मुद्दामा थप अनुसन्धान गरिने उनले बताए ।
