पर्सा — वीरगन्ज महानगरपालिका–१२ मुर्लीको नयाँ टोलमा हैजाका बिरामी भेटिएका छन् । हैजाको संक्रमणबारे जानकारी पाएलगत्तै रोकथाम तथा नियन्त्रणका लागि वीरगन्ज महानगरले शुक्रबार रातिदेखि स्वास्थ्यकर्मीको टोली प्रभावित क्षेत्रमा परिचालन गरेको छ ।

महानगरको स्वास्थ्य महाशाखा तथा जिल्ला स्वास्थ्य कार्यालयका स्वास्थ्यकर्मी समेतको टोली नै संक्रमित क्षेत्र पुगेर अवस्थाको जानकारी लिनुका साथै स्थानीयलाई सतर्क गराउने कार्य सुरु गरेको छ ।

वीरगन्ज महानगरका प्रमुख राजेशमान सिंहका प्रेस सल्लाहकार नवराज फुयालका अनुसार, मुर्ली टोलका करिब ३० जना बासिन्दा झाडापखालाको कारण वीरगंजस्थित तराई अस्पतालमा भर्ना भएका थिए । 

एकैपटक ठूलो संख्यामा बिरामी आएपछि अस्पतालले शंकास्पद देखेर महानगरलाई खबर गरेको थियो । लगत्तै नारायणी अस्पताल र जिल्ला स्वास्थ्य कार्यालयसँगको समन्वयमा गरिएको परीक्षणमा तीन जनामा हैजाको जीवाणु भिब्रियो कोलेरा पाइएको हो । 

संक्रमितमध्ये १६ वर्षीय बालक, २४ वर्षीय युवक र २४ वर्षीय महिला रहेका छन् । तीमध्ये बालकको अवस्था गम्भीर रहेको महानगर स्वास्थ्य शाखा प्रमुख राजु शाहले जानकारी दिएका छन् ।

मुर्ली टोलका घरहरूमा प्रयोग भइरहेको पिउने पानीको नमुना थप परीक्षणका लागि काठमाडौंको टेकुस्थित स्वास्थ्य विज्ञान प्रयोगशालामा पठाइएको छ ।

हैजा फैलन नदिन र स्थानीयलाई सतर्क बनाउन शुक्रबार रातिदेखि नै स्वास्थ्यकर्मीहरूको टोली घर–घरमा पुगेको छ । टोलीले हैजाबाट जोगिने उपायहरूबारे जानकारी दिँदै कुनै पनि शंकास्पद बिरामी भेटिए तत्काल नजिकैको स्वास्थ्य संस्थामा लैजान आग्रह गरेको छ । 

सचेतना अभियानमा जिल्ला स्वास्थ्य कार्यालयका अधिकृत जयमोद ठाकुर, महानगरका जनस्वास्थ्य अधिकृत सुमनचन्द्र ठाकुरलगायतको टोली सक्रिय छ ।