मुख्यमन्त्री सिंहले गौर प्रादेशिक अस्पतालमा मातृ शिशु स्वास्थ्य क्लिनिकको उद्घाटन गर्दै गुणस्तरयुक्त स्वास्थ्य सेवा सुनिश्चित गर्न निर्देशन दिए।
रौतहट — मधेश प्रदेशका मुख्यमन्त्री सतिशकुमार सिंहले सरकारी अस्पतालप्रति आमनागरिकको विश्वास बढाउन आवश्यक रहेको बताएका छन् । ‘निजीभन्दा सरकारी अस्पतालप्रति नागरिकले विश्वास धेरै गर्छन्,’ उनले भने, ‘हामीले सकेसम्म छिटो र विश्वसनीय सेवा दिएर जनताको मन जित्नुपर्छ ।’
रौतहट सदरमुकाम गौरस्थित प्रादेशिक अस्पतालको मातृ शिशु स्वास्थ्य (एमसीएच) क्लिनिक र चमेनागृहको उद्घाटन गर्दै मुख्यमन्त्री सिंहले न्यूनतम खर्चमा नागरिकले गुणस्तरयुक्त स्वास्थ्य सेवा पाउने अवस्था सिर्जना गर्न स्वास्थ्यकर्मीलाई निर्देशन दिए । गौर प्रादेशिक अस्पतालमा नर्सिङ पढाइ सुरु गर्न पहल गर्ने मुख्यनन्त्री सिंहले आश्वासन दिए ।
‘गैरकानुनी रूपमा सञ्चालित निजी अस्पताललाई अनुगमनमार्फत बन्द गराएको छु,’ उनले भने, ‘केहीले स्थानीय तहको अनुमति लिएर पुनः सञ्चालन गरेका छन् । अधिकांशले मापदण्ड पूरा नगरेको जानकारी प्राप्त भएको छ । अस्पताल अनुगमनलाई निरन्तरता दिनेछु ।’
मुख्यमन्त्री सिंहले निजी अस्पतालको अनुगमन गर्दै इजाजतबिना संचालनमा रहेका अधिकाश अस्पताल बन्द गराएका थिए । यहाँका केही स्थानीय तहले भने मापदण्डबिना संचालित अस्पताललाई पनि छुट दिएका छन् ।
मधेश प्रदेशका स्वास्थ्य तथा जनसंख्या मन्त्री शत्रुधनप्रसाद सिंहले संघीयताअघि र पछि अस्पतालको अवस्था स्पष्ट रूपमा फरक देखिन थालेको उल्लेख गरे ।
