बारा — लामो समयको खडेरीपछि बाराका विभिन्न ठाउँमा शनिबारदेखिको वर्षाले रोपाइँपछि धाँजा फाटेको धान खेतमा राहत मिलेको छ भने रोपाइँ हुन नसकेका सुक्खा खेतको भिजेका छन् ।

खेतमा पानी जम्ने गरी वर्षा भने हुन नसकेपछि किसान अझै बिलौना नै गरिरहेका छन् । कृषि ज्ञान केन्द्र बाराका प्रमुख राजनारायण साहकाअनुसार पर्याप्त वर्षा नभएपछि जिल्लाका अझै १५ प्रतिशत रोपाइँ हुन सकेको छैन । 

जिल्लाभरि ४६ हजार हेक्टर जमिनमा हुने धान खेतीको ८५ प्रतिशत मात्र रोपाइँ हुन सकेको उनले बताए । ‘यतिको रोपाइँ वर्षा, नहर, खोला वा कुलोपैनीको पानीले भएको होइन, सबै ट्युबेल (बोरिङ) ले मोटर र पम्पीसेटको माध्यमले जमिनमुनिबाट पानी तानेर भएको हो,’ उनले भने, ‘दुई दिनको झरीले धाँजा फाटेको खेतको धानमा जरामुनि कतै कतै पानी जमेको छ भने रोपाइँ बाँकी रहेको सुक्खा खेतको जमिन थोरै भिजेको छ ।यो झरीले रोपाइँ अझै हुन सक्दैन ।’

जिल्लाको नेपाल–भारत दसगजासित जोडिएका खेतमा रोपाइँ हुन नसकेको हो । सिम्रौनगढ, पचरौता, सुवर्ण, देवताल, कलैया, फेटा, बिश्रामपुर पालिकाका थुप्रै वडाहरुमा अझै रोपाइँ हुन नसकेको उनले बताए । उनकाअनुसार जहाँ ट्युबेल र बिजुलीको सुविधा छ त्यहाँ किसानले जसोतसो रोपाइँ गर्न भ्याएका छन् । तर त्यो रोपाइँमा पनि धाँजा फाटेको छ ।