शनिबार बिहान करेन्ट लागेर खंग दम्पतीको निधन भयो, प्रदेश सरकारले नागरिक बीमा प्रक्रियालाई सहज बनाउँदै छ।
What you should know
राजविराज — ई–रिक्सा चार्ज गरिरहँदा करेन्ट लागेर मृत्यु भएका सप्तरीको रूपनी गाउँपालिका–२ पौवाँका खंग दम्पतीका परिवारलाई नागरिक बीमाको सुविधा उपलब्ध गराउन पहल सुरु भएको छ ।
बिहीबार मधेश प्रदेश सरकारका उच्चस्तरीय टोलीले पीडितको घरमा पुगेर घटनाबारे जानकारी लिएको हो । प्रदेश सरकारले गत साउन १ गतेदेखि लागू गरेको नागरिक बीमाको सुविधा उपलब्ध गराउने उद्देश्यले घटनाबारे जानकारी लिनुका साथै आवश्यक कागजात संकलन गर्ने कार्य सुरु गरिएको मुख्यमन्त्रीका प्रेस सल्लाहकार अवधेशकुमार झाले जानकारी दिए । ‘उहाँहरुको दुःखमा प्रदेश सरकार पनि दुःखी छ,’ उनले भने, ‘थोरै भए पनि हामी मलहम लगाउने प्रयास गरिरहेका छौं, नागरिक बीमाको प्रक्रिया अझ सहज पार्न स्थानीय तह र अन्य निकायसँग समन्वय भइरहेको छ ।’
प्रदेश सरकारको उच्चस्तरीय टोलमा खेलकुद तथा समाज कल्याण मन्त्रालयका निमित्त सचिव रञ्जितकुमार यादव, मुख्यमन्त्रीका प्रेस सल्लाहकार झा, मन्त्रालयका उपसचिव धर्मेन्द्रलाल कर्ण र बीमा कम्पनीका प्रतिनिधि लगायतका उपस्थित थिए ।
शनिबार बिहान ४२ वर्षीय बालेश्वर खंग ‘कैला’ आफ्नो ई–रिक्सा चार्ज गरिरहँदा अचानक करेन्ट लागेर ढलेका थिए । केहीबेरसम्म उनलाई नदेखपछि खोज्दै हिँडेकी ३८ वर्षीया पत्नी रामकुमारीले पतिलाई ढलेको देख्नासाथ उठाउन गएकी थिइन् । करेन्ट लागेर उनी पनि त्यहीँ ढलेकी थिइन् ।
दुवैलाई करेन्ट लागेपछि छुटाउन गएकी भतिजी २४ वर्षीया प्रमिलाकुमारीलाई पनि करेन्ट लागेर टाउकोमा चोट लागेको थियो । ई–रिक्सा चलाएर परिवार चलाउँदै आएका खंग दम्पतीको मृत्युपछि मृतकका दुई छोरा १९ वर्षीय सुरज र १० वर्षीय निरज बेसहारा भएर छाक टार्न कठिन भइरहेको छ ।
