जनकपुरधाम — जनकपुरधाममा किशोरी हत्याका अभियुक्त पक्राउ परेका छन् । बिहीबार धनुषा प्रहरीले बटेश्वर गाउँपालिका–५ का १५ वर्षीया अञ्जली यादवको हत्या आरोपमा क्षीरेश्वरनाथ नगरपालिका–९ इच्छापुरका ३५ वर्षीय रामबाबु साहलाई पक्राउ गरेको हो ।

साहले गएको सोमबार जनकपुरधाम उपमहानगरपालिका–४ स्थित अञ्जली बसोबास गरिरहेको भाडाको घरमा पुगी राति ११ बजे अन्धाधुन्ध खुकुरी प्रहार गरेका थिए । खुकुरी प्रहारबाट अञ्जलीको मृत्यु भएको थियो भने उनकी आमा आशादेवी यादव र मिथिला नगरपालिका–९ ढलकेवरकी राधा यादव घाइते भएका थिए ।

राधा मृतक अञ्जलीकी मामाकी छोरी हुन् । खुकुरी प्रहारबाट गम्भीर घाइते आशाको उपचार धरानस्थित बीपी कोइराला स्वास्थ्य विज्ञान प्रतिष्ठानमा भइरहेको छ भने राधा डिस्चार्ज भई घरमा रहेको धनुषाका डिएसपी बरुणबहादुर सिंहले जानकारी दिए ।

उनका अनुसार अभियुक्तले यसअघि श्रीमती सरितादेवी साहको हत्या गरेका थिए । २०७१ चैत २ गते हत्या गरेर अभियुक्त साह ५ वर्ष जेल भुक्तानी गरेर २०७७ सालमा रिहा भएका थिए । खुकुरी प्रहारबाट घाइते भएकी आशासँग अभियुक्त रामबाबुको सम्बन्ध रहेको प्रहरी अनुसन्धानबाट खुलेको छ । ‘अभियुक्त र आशा सम्बन्धमा रहेको देखिन्छ । अभियुक्तसँग नियमित आर्थिक लेनदेन पनि देखिन्छ,’ डीएसपी सिंहले भने, ‘आशा आर्थिक रुपमा सबल भएपछि अभियुक्तलाई बेवास्ता गरेको देखिन्छ ।’