महोत्तरी — गौशाला नगरपालिकाका प्रमुख डा.दिपेन्द्र महतोले निगौल गाई गौशाला व्यवस्थापन कार्यालय र नगरपालिकाबीच सामान्य असमदारी हुँदा अराजक समूहले विवाद चर्काएको आरोप लगाएका छन् ।

गौशाला बजार ठेक्का विवादमा सोमबार राजस्व संकलन क्रममा गौशाला र नगरपालिका पक्षधरबीच भएको झडपमा अराजक समूहको घुसपैठ भएको नगर प्रमुख महतोको आरोप छ ।

गौशाला व्यवस्थापन कार्यालयका कर्मचारीले केही अराजक व्यक्तिको समूह बनाई सुनियोजित तरिकाले झडप गराएको महतोले बताए । ‘राजस्व हिनामिना गरी नगरपालिकालाई डर, धाक र धम्कीको चुनौती नै दिन यो क्रियाकलाप भएको देखिन्छ । सोमबार भएको घटना जबरजस्ती नियमविपरीत राजस्व उठाउनु र गुण्डागर्दी गर्नु हो,' उनले भने ।

स्थानीय बजार व्यवस्थापन स्थानीय तहको एकल अधिकार सूचीमा रहेको उल्लेख गर्दै महतोले गौशाला बजार ठेक्का बन्दोबस्त गरी आन्तरिक आय संकलन गर्दै आएको विज्ञप्तिमार्फत सम्झाएका छन् ।२०८२/०८३ मा खुल्ला डाकबढाबढ प्रक्रियाअनुसार कानुनसम्मत ठेक्का सम्झौता गरिसकेको अवस्थामा गौशाला व्यवस्थापन कार्यालयका कर्मचारीले कार्यालयकै नाममा मवेशी बजारको नामले जबरजस्ती कानुनविपरीत रसिद काटी बजारमा गुण्डाशैलीमा बजारको आय असुली गरेको महतोले आरोप लगाए ।