बलात्कार घटनामा छोरालाई जन्मकैद, बाबुआमा मतियार
महोत्तरी — खण्डहर बनिरहेको तीनतले ठूलो पक्की घरको भित्तामा लेखिएका शब्दले जोकोहीलाई झस्काउँछ । बर्दिबास नगरपालिका–१४ स्थित शुभम बस्तीमा सुनसान र आगोले जलिनसकेको भित्तामा टाढैबाट देखिने गरी लेखिएको छ- ‘यो घर जग्गा अपराधीको हो । किनबेच गर्न पाइनेछैन ।’
यो घरको कथा बुझ्न ५ वर्षअघि फर्कनुपर्ने हुन्छ । बर्दिबास–१४ स्थित शुभम बस्तीमा रहेको उक्त घरमा भएको घटनाका पीडित अहिले पनि न्यायकै पर्खाइमा छन् ।
२०७७ मंसिर ७ गते साँझपख सोही घरमा रहेको पसलमा चकलेट किन्न पुगेकी छिमेककी ६ वर्षीया बालिका गुलाबसा खातुन घर फर्किनन् । बेपत्ता गुलाबसाको खोजी गर्ने क्रममा मंसिर ९ गते राति सोही घरको पछाडिपट्टि बाँसघाँरीमा बलात्कार गरी हत्या गरिएको अवस्थामा बोरामा शव फेला पर्यो । त्यसबखत बालिकाको शव सडकमा राखेर न्यायका लागि भन्दै बर्दिवासमा चर्किएको आन्दोलनले थप एक जनाको ज्यान लियो । सोही घटनाका क्रममा प्रहरीको गोली लागेर बर्दिवास–१ का सञ्जय न्यौपानेको मृत्यु भयो ।
पक्राउ परेका घटनाका अभियुक्त २७ वर्षका अरुण साहलाई महोत्तरी जिल्ला अदालतले दोषी ठहर गर्दै २०७९ माघ २४ गते जन्मकैदको सजाय सुनायो । साहलाई जबरजस्ती करणी, शरीर बन्धक, अपहरण र हत्या गरी ४ वटा मुद्दामा अदालतले दोषी ठहर गरेको छ ।
अरुण सजाय भुक्तान गरिरहेका भए पनि घटनासँगै फरार भएका उनका बुबा ६० का राजकिशोर साह र आमा ५१ वर्षकी सुशीलादेवी साहलाई भने प्रहरीले ५ वर्षपछि पक्राउ गरी आइतबार सार्वजनिक गर्यो । घटना भएको उक्त घर साह परिवारकै हो । गौशाला नगरपालिका-५ मा पनि उनीहरूको अर्को घर छ ।
घटनापछि भारतमा बस्दै आएका दुवै जनालाई जलेश्वर–१२ स्थित नैन्हीबाट गोप्य सूचनाका आधारमा इलाका प्रहरी कार्यालय बर्दिबाससहितको टोलीले नियन्त्रणमा लिएको महोत्तरी प्रहरी प्रमुख एसपी हेरम्ब शर्माले जानकारी दिए । घटनाबारे थप अनुसन्धान गरी कारबाही अघि बढाउने उनले बताए ।
राजकिशोर र सुशीलादेवीले छोरालाई शव व्यवस्थापन गर्न सुझाएको पाइएकाले उनीहरु घटनाको मतियार रहेको प्रहरीको भनाइ छ ।
छोरीको बिभत्स हत्या भएको घरले समेत आफूहरुलाई सधैं अशान्ति दिइरहेको गुलाबसाकी आमा सविना खातुन बताउँछिन् । उक्त घर भएको ठाउँमा शान्ति पार्क बनाएर पक्राउ परेका मानिसलाई सजाए दिए मात्र छोरीलाई शान्ति मिल्ने उनको विश्वास छ । ‘रोएर मेरा त आँखा रित्तिइसके । यस्तो घटना कसैलाई नहोस् भन्नका लागि दोषीहरुले सजाय पाउनुपर्छ,’ उनले भनिन् ।
उक्त घटना त्यही घरमा भएको पुष्टि भएसँगै समुदायले गुलाबसाको शव फेला परेकै दिन साहको घरमा आगजनी गरेका थिए । ‘घटना कहालीलाग्दो थियो, फेरि त्यस्तै होला कि भनेर मानिसहरु अझै डराइरहेका छन्,’ स्थानीय बबिता साह बताउँछिन् ।
उक्त क्षेत्रमा घटना भएको ५ वर्षयता नयाँ घर बनाउने र जग्गा किनबेच नै ठप्प भएको गुलाबसाकी फुपू आर्फा खातुनले बताइन् ।
प्रहरीले गुलाबसा घटनाका फरार व्यक्ति पक्राउ गरे पनि सञ्जय मृत्यु प्रकरणमा भने सरकारले कुनै न्यायको कदमअघि बढाएको छैन । घटनाको ५ वर्ष बित्दा समेत खातुन र न्यौपानेको परिवार न्याय र क्षतिपूर्तिकै पर्खाइमा छ । प्रहरी नियन्त्रणमा पुगेका दोषी कतै उम्किने आशंकामा गुलाबसामा बुबा साहिद आलम र उनको परिवार अहिले पनि प्रहरी प्रशासनमै धाइरहेको छ ।
