पर्सा — कृषि सामग्री कम्पनीको ग्लोबल टेन्डरबाट आयात गर्ने भनिएको युरिया मल रोपाइँको समयमा नभित्रिए वर्षे धान बाली सिजनमा मलको अभाव हुने सम्भावना छ ।
भारतको आइपीएल कम्पनीले कम्पनीको ३० हजार टन मल आपूर्तिको ठेक्का पाएकोमा उसको मल भित्रिने सम्भावना अझै देखिएको छैन । कम्पनी मधेश प्रादेशिक कार्यालय वीरगन्जका प्रमुख दुर्गाप्रसाद पाण्डेले आइपीएलको उक्त कन्साइन्मेन्टको मल कहिलेसम्म नेपाल भित्रीसक्छ भनी अझै यकिन साथ भन्न नसकिने बताए ।
नेपाल सरकारले भारत सरकारसँग जि–टु–जी प्रक्रियाबाट सोझै खरिद गर्न लागेको मल भने यसै साताको अन्त्यतिर भित्रिन थाल्ने सम्भावना रहेको उनले बताए । भारत सरकारबाट ३० हजार टन युरिया मल आपूर्तिको ठेक्का पाएको आदित्य बिरला कम्पनीले उक्त मल तेस्रो मुलुकबाट खरिद गरी गत साता नै कोलकाता बन्दरगाहमा ल्याइसकेको र हाल त्यहाँ बोरामा मल प्याकिङको काम भइरहको उनले बताए ।
कार्यालय र मधेश प्रदेशका मातहतका कार्यालयहरूमा गरी हाल युरिया मल १२ हजार २ सय ९२ टन मौज्दात रहेको उनले बताए । उक्त मल हाल वितरण नगरिएको र आउँदो सातादेखि जिल्लाका सहकारीहरूलाई वितरण गरिने उनले बताए । यस अवधिमा ‘जि–टु–जी’ को ३० हजार टन मल भित्रिन थाल्ने सम्भावना रहेको छ । त्यसलगत्तै पाइपलाइनमा रहेको आइपीएलको ३० हजार टन युरिया भित्रिएको खण्डमा वर्षे धान बाली सिजनमा युरिया मलको अभाव नहुने उनले बताए । तर आइपीएलले मल आपूर्ति गर्न ढिलाइ गरे भने समस्या हुन सक्ने उनले बताए ।
‘जि–टु–जी’ को ३० हजार टन युरियामध्ये कम्पनी मधेश प्रादेशिक कार्यालयले ११ हजार ५ सय टन, भैरहवा प्रादेशिक कार्यालयले १० हजार टन र विराटनगर प्रादेशिक कार्यालयले ८ हजार ५ सय टन मल पाउने छन् ।
मधेश प्रदेशभरिमा गरी हाल १२ हजार २ सय ६५ टन डिएपी र २ हजार ५ सय ८७ टन पोटास मल पनि मौज्दात रहेको उनले बताए । तर यी मल हाल किसानलाई आवश्यक छैन ।
