पर्सा — जगरनाथपुर गाउँपालिकाका किसान सुख्खामा छरुवा धान प्रविधिबाट धान खेतीतर्फ आकर्षित भएका छन् । उनीहरुले क्षजिरो टिल सिड कम फर्टिलाइजर ड्रिल मेशिननको माध्यमले परम्परात खेतीभन्दा भिन्न सुख्खा खेतमै धानको बिउ छरेर धान खेती गरिरहेका छन् ।

यो प्रविधिका लागि गाउँकै अगुवा किसान अभय प्रसाद यादवले उक्त उपकरण खरिद गरी एक दशकयता प्रयोगसमेत गरिरहेका छन् । पछिल्लो केही वर्षयता गाउँका अन्य किसानले पनि यादवको उक्त उपकरण भाडामा लिएर छरुवा प्रविधिबाट खेती गर्न थालेका छन् ।

यसवर्ष जगरनाथपुर गाउँपालिका–३ बिजबनियाका किसानले ६० बिघाभन्दा बढी खेतमा यो प्रविधिबाट बर्षे धान बाली लगाइसकेका छन् । यादव आफैंले १६ बिघा जग्गामा रोपाइँ गरिसकेका छन् । उनका छिमेकी जहीर गद्दीले ३, मोजाहिर मियाले ३, लोहा सिंहले साढे दुई, धर्मेन्द्र पटेलले एक बिघामा यो प्रविधिबाट धान खेती गरेका छन् । अन्य थुप्रै किसानले पनि यो उपकरणको मद्दतले धान खेती गरेका छन् ।

ट्याक्टरले चल्ने यो उपकरणले १ घण्टामा ९ देखि १० कठ्ठा खेतमा धानको बिउ छरिसक्छ । २ जना मात्र जनशक्ति खटिएपछि सजिलै यसरी बिउ छर्न सकिन्छ । बिउसँगै रासायनिक मल पनि छर्न सकिन्छ । यादवले ८० हजार रुपैयाँमा दशक अघि यो उपकरण खरिद गरी आफ्नो खेतमा रोपाइँ गरिरहेका छन् । आफ्नो खेतमा प्रयोग गरी सकेपछि छिमेकी किसानलाई प्रतिघण्टा १ हजार ५ सय रुपैयाँमा भाडामा पनि दिने गरेका छन् ।

आफ्नो धेरै खेत रहेको र कृषि मजदुरको भरमा कृषि कर्म गर्दा समयमा रोपाइँ र बाली भित्र्याउनसमेत नसकिने भएपछि आफू यान्त्रिकरणतर्फ आकर्षित भएको यादव बताउँछन् । उनले यान्त्रिकरण आफ्नो रहर र बाध्यता दुवै भएको बताए । 

सुरुमा मेशिनले रोपाइँ गर्दा छिमेकीहरुले नै खिल्ली उडाउने गरेकोमा हाल भने तीनै छिमेकीहरु आफ्नो यो उपकरण भाडामा लिई धान खेती गर्न थालेकोमा उनी खुसी छन् । परम्परागत विधि भन्दा यान्त्रिकरणले रोपाइँको लागत ६० प्रतिशत सम्म घटेको अर्का किसान जहीर गद्दी बताउँछन् ।