राजविराज — टाउन प्लानिङ गरी बसाइएको सप्तरीको राजविराजमा ८५ वर्षपछि बसपार्क सञ्चालनमा आएको छ । चौथो पटकको शिलान्यास र ६ पटक म्याद थप भएपछि बहुप्रतिक्षित बसपार्क निर्माण समपन्न हुन सकेको हो । राजविराज नगरपालिका–२ राजदेवी चोकमा निर्माण भएको राजविराज बसपार्कको बिहीबार कार्यवाहक नगरप्रमुख ईसरत परविणले उद्घाटन गरेपछि यो बसपार्क सञ्चालनमा ल्याइएको हो ।

१९९७ सालमा राजविराज सहर बसाइएपछि बसपार्कको आवश्यकता महसुस गरिएको थियो । विभिन्न नाममा शिलान्यास हुँदै गएपनि बसपार्क निर्माणको कार्य अलपत्र पर्दै आएको थियो ।

बसपार्क सञ्चालनमा आउन नसक्दा अहिले राजविराजका मुख्य सडकमै बसहरू पार्किङ गरेर राखिने र त्यहीँबाट बसहरू सञ्चालन हुने गरेको छ । मुख्य सडक र चोकबाटै बसहरू सञ्चालन हुँदा ट्राफिक व्यवस्थापन अव्यवस्थित भएको छ भने नगरको स्वरूप पनि कुरूप बनाएको थियो । बसपार्क निर्माण सम्पन्न भएपछि नगरको ट्राफिक व्यवस्थापनमा सहजता आउनुका साथै नगरको सुन्दरतासमेत बढ्ने विश्वास लिइएको राजविराज नगरपालिका प्रवक्ता एवं वडाध्यक्ष जयनारायण मण्डलले बताए ।

पछिल्लो पटक राजविराज–२ मा व्यवस्थित बसपार्क निर्माणका लागि सघन सहरी तथा भवन निर्माण आयोजना राजविराजले गरेको टेन्डर अनुसार २०७४ पुस १९ गते सम्झौता भएको थियो । आयोजना राजविराज कार्यालयका प्रमुख सुरेन्द्रकुमार साहका अनुसार भ्याटबाहेक १६ करोड ३८ लाख ९६ हजार ५ सय १९ रुपैयाँमा सिनर्जी बिल्डर्स प्रालि कुलेश्वर काठमाडौँले उक्त ठेक्का लिएको र २०७७ पुस १८ गतभित्र निर्माण कार्य सम्पन्न गर्नुपर्ने सम्झौता रहेको थियो । भेरिएसनपछि १५ करोड ६० लाखमा बसपार्क निर्माण सम्पन्न भएको छ ।