महोतरी — सम्सी गाउँपालिकाको गाउँसभाले सार्वजनिक पोखरी व्यक्तिगत बनाउने निर्णय गरेको पाइएको छ । सम्सी गाउँपालिकाका अध्यक्ष रामनाथ यादवले २०७९ असार १० गते भएको सातौं गाउँ सभाबाट सार्वजनिक १९.५ कठ्ठा क्षेत्रफल भएको पोखरी व्यक्तिगत बनाउने निर्णय गरेको पाइएको हो ।

गाउँपालिकाको वडा नम्बर ४ का वडाध्यक्ष राजिव यादवले आफ्ना हजुरबुवा रामचरित्र यादवलाई श्री ५ सरकारको नामले चिनाएर उक्त जग्गा आफनो परिवारको हकभोगमा रहेको भन्दै गाउँसभाबाट श्री ५ सरकारको नाममा रहेको गैंडाभेटपुर गाउँ पञ्चायत वडा नं. ७ कित्ता नं. २२ को क्षेत्रफल ०–१९–५ पोखरी जग्गा व्यक्तिगत भएको निर्णय गरेको हो ।

गाउँपालिका अध्यक्ष रामनाथ यादव र वडाध्यक्ष राजिव यादव जनता समाजवादी पार्टीबाट निर्वाचित हुन् । गाउँपालिकाको कार्यालयमा उक्त पोखरी भएको जग्गा आफ्नो परिवारको हकभोगमा भएको प्रमाणित गराउन निवेदन दिइएको थियो । निवेदनलाई गाउँसभाबाट सम्बोधन गराएको गाउँपालिकाका कर्मचारीले बताए ।

निर्णयमा भनिएको छ, ‘गाउँपालिका–४ पुर्वारी टोल भेटपुरस्थित सरकारी पट्टी पोखरी पानीकर सम्बन्धमा साविक गैंडाभेटपुर गाउँ पञ्चायत वडा नं. ५ मा बस्ने जीवन राउतको नाति तिलक रायको छोरा राम चरित्र यादव भन्ने श्री ५ सरकार नामक व्यक्ति हकभोग एवं स्वामित्वमा रहेको र निजको पिता पुर्खाले खनाएको पुर्खौली पोखरी सर्वे नापी हुँदा गैंडाभेटपुर गाउँ पञ्चायत वडा नं. ७ कित्ता नं. २२ को क्षेत्रफल ०–१९–५ पोखरी पानीबहाव राम चरित्र यादवको उर्फ नाम श्री ५ सरकार नाउले नापी भएको गाउँ सभाबाट ठहर गरेको छ । ’ 

यस्तै निर्णयमा अघि भनिएको छ, ‘पोखरी राम चरित्र यादव भन्ने श्री ५ सरकारको भाई मौजे राय एवं भागवत रायसमेतले भोगी आएपछि उनीहरुको मृत्युपछि उनको शेषपछिका हकदार सरसन्तानहरुले भोगी उपरोक्त पोखरीको साल बसालको पानी कर जिल्ला विकास समितिको कार्यालय महोत्तरीलाई बुझाई आएको र अब यस गाउँपालिकालाई बुझिलिने निर्णय गरेको छ ।’