रौतहट — प्रमुख भन्सार कार्यालयमा ‘प्लान्ट क्वारेन्टाइन’ स्थापनाको माग राख्दै रौतहटका व्यवसायीले सुरु गरेको धर्नामा रौतहट उद्योग वाणिज्य संघले ऐक्यबद्धता जनाउँदै मंगलबार सहभागी भएका छन् । संघका अध्यक्ष पण्डितप्रसाद जयसवाल, महासचिव रवीन्द्रनाथ गोपालीसहित कार्यसमितिका सदस्य गौर भन्सारको मुख्य गेटमा धर्नामा बसेर ऐक्यबद्धता जनाएका हुन् ।

प्रमुख भन्सारमा प्लान्ट क्वारेन्टाइन नहुँदा जिल्लाका व्यापारीलाई वीरगन्ज र सर्लाही नाका हुँदै सामान ल्याउनुपर्ने बाध्यता भएकाले सरकारले तत्कालै यसको व्यवस्था गरोस् भनेर दबाब दिन आइतबारबाट सुरु धर्नामा ऐक्बयद्धता जनाएको जयसवालले बताए ।

‘यहाँको समस्या अहिलेदेखिको होइन । राज्य यति निरीह हुन थाल्यो कि व्यवसायीहरुको समस्या समाधान गर्न धर्ना आन्दोलन नै गर्नुपर्ने,' उनले भने, ‘व्यवसायी साथीहरुले अघि सारेको मागप्रति हाम्रो पूर्ण समर्थन र ऐक्यबद्धता छ ।’

व्यापारीहरुले चैत ३१ गते भन्सार कार्यालय प्रमुखमार्फत अर्थमन्त्रीलाई ज्ञापनपत्र बुझाएका थिए । गौर भन्सारबाट खाद्यान्न लगायत कृषिजन्य वस्तुको आयात, निर्यात हुँदा ५० प्रतिशत राजस्व यही शीर्षकबाट संकलन हुँदै आएको व्यवसायीको दाबी छ ।

२०३३ सालमा स्थापना भएको गौर भन्सारमा ‘प्लान्ट क्वारेन्टाइन’ छैन । २०७६ सालसम्म यहाँका व्यवसायीले भारतबाट खाद्यान्न, फलफूल, तरकारी लगायतको वस्तु आयात गर्दा गौर भन्सारमा राखेर यहीँबाट नमुना वीरगन्ज पठाइन्थ्यो । त्यहाँबाट ठिकठाक भएको प्रतिवेदन आएपछि भन्सारले राजस्व असुल्थ्यो । त्यस बेला ५० प्रतिशतभन्दा बढी राजस्व कृषिजन्य वस्तुबाट असुल हुने गरेको प्रमुख भन्सार अधिकृत अमरेन्द्रकुमार सिंहले बताए ।