राजविराज — सप्तरीको महेन्द्र विन्देश्वरी बहुमुखी क्याम्पस राजविराजको स्ववियु सभापतिमा रञ्जितकुमार यादव दोहोरिएका छन् ।
मंगलबार सम्पन्न मतदानपछि भएको मतगणनामा समाजवादी विद्यार्थी युनियन र अखिल क्रान्तिकारीका संयुक्त उम्मेदवार रहेका यादव ३ सय ९३ मत प्राप्त गर्दै दोस्रो कार्यकालका लागि निर्वाचित भए ।
निर्वाचन समितिका संयोजक नन्दकिशोर यादवका अनुसार उनका निकटम प्रतिद्वन्द्वी स्वतन्त्रबाट विनयकुमार यादवले ३ सय ३२ मत प्राप्त गरेका छन् । यस्तै सचिवमा पनि सोही प्यानलका मुकेशकुमार साह निर्वाचित भएका छन् ।
साहले ३ सय ९५ मत पाउँदा उनका निकटतम प्रतिद्वन्द्वी अजय यादवले ३ सय २४ ले मत प्राप्त गरे । त्यस्तै, कोषाध्यक्षमा कञ्चनकुमारी ठाकुर ४ सय १० मत ल्याउँदै निर्वाचित भइन् । उनका प्रतिस्पर्धी मो.अबुजर आलमले २ सय ९५ मत प्राप्त गरे ।
प्रत्यक्षतर्फ सदस्य र समानुपातिकतर्फको मतगणना भने हुने क्रममा रहेको निर्वाचन समितिका संयोजक यादवले बताए । कूल तीन हजार १२ जना मतदाता रहेको मंगलबार मतदान हुँदा ४६ दशमलव ६० प्रतिशत मत खसेको थियो ।
