रौतहट — प्रादेशिक अस्पताल गौरमा उपचारका लागि आएका बिरामीलाई उपकरणको अभाव भन्दै निजीमा पठाउने तीन जना चिकित्सकलाई अस्पताल प्रशासनले २४ घण्टे स्पष्टीकरण सोधेको भए पनि उनीहरूले अहिलेसम्म पत्र बुझेका छैनन् ।

उनीहरू सम्पर्कविहीन भएकाले अस्पतालले स्पष्टीकरणको पत्र इमेल र हुलाकमार्फत पठाउने तयारी गरेको छ । गएको शनिबार दिउँसो प्रादेशिक अस्पताल गौरमा उपचारका लागि आएका बिरामीलाई निजीमा पठाएर शल्यक्रिया गर्दा मृत्यु भएको थियो ।

घटना पछि चिकित्सकको लापरबाही भन्दै कारबाहीको माग राखेर पीडित परिवारले प्रहरी प्रशासन गुहारेका थिए । घटनाको निष्पक्ष छानबिनका लागि पीडित परिवारले दबाब दिएपछि अस्पतालले सोमबार चिकित्सकलाई स्पष्टीकरण सोधेको थियो । तर, पत्र भने तीनै जना चिकित्सकले बुझेका छैनन् । उनीहरू अस्पताल समेत आएका छैनन् । तीनै जना करारका चिकित्सक हुन् ।

प्रादेशिक अस्पताल गौरले चिकित्सक डा. पंकज साह, डा. फिरोज अन्जुम र डा. घनश्याम ठाकुरलाई २४ घण्टे स्पष्टीकरण सोधेको हो । घटनापछि चिकित्सकहरू सम्पर्कविहीन रहेको अस्पतालका अध्यक्ष अनवर हास्मीले जानकारी दिए । ‘तीनै जना चिकित्सकलाई बिरामीलाई कुन अवस्थामा रिफर गरियो, लापरबाही हो/होइन भन्ने विषयमा स्पष्टीकरण सोधेको हो,’ उनले भने, ‘पत्र बनाएर तयार राखेका छौँ । तर उहाँहरू सम्पर्कमा हुनुहुन्न । सबैको मोबाइल अफ छ । हामी हुलाक र इमेलबाट पत्र पठाउँछौँ ।’

गौर नगरपालिका–३ का १८ वर्षीय लालु अधिकारीको शल्यक्रिया गर्दा मृत्यु भएपछि चिकित्सकको लापरबाही भन्दै पीडितका आफन्तले छानबिनको माग गरेका हुन् । मृत्यु भएका अधिकारीको शल्यक्रिया गरिएको गौर सेन्ट्रल अस्पतालले मंगलबार विज्ञप्ति निकालेर दुःखद घटना भएको भन्दै पीडित परिवारसँग माफी मागेका छन् ।

गएको शनिबार दिउँसो अधिकारीलाई पेट दुखेर उपचारका लागि प्रादेशिक अस्पताल गौरमा भर्ना गरिएको थियो । त्यहाँ केही परीक्षण गराएर अस्पतालका मेडिकल अधिकृत डा. घनश्याम ठाकुरले बिरामीको आन्द्रा फुटेको बताएका थिए ।

मृतकका काका देवेन्द्र अधिकारीका अनुसार डा. ठाकुरले अस्पतालमा शल्यक्रियाका लागि आवश्यक एनेस्थेसिया (बेहोस बनाउने) चिकित्सक नभएको भन्दै अर्का डा. पंकज साहसँग सम्पर्क गर्न भनेका थिए । डा. साहले नै गौर सेन्ट्रल अस्पताल लैजान भनेको पीडितको भनाइ छ । सरकारीबाट निजीमा लगेर चिकित्सक साह आफैँ शल्यक्रिया गर्न पुगेका थिए । उनले शल्यक्रिया गरेपछि बिरामीको अवस्था झन् गम्भीर भएको थियो । त्यसपछि बिरामीलाई राति नै नेशनल मेडिकल कलेज वीरगन्ज लगिएको थियो । मेडिकल कलेजमा चिकित्सकले बिरामी मृत्यु भएको जानकारी गराएको थियो । अधिकारीको मृत्युपछि प्रादेशिक अस्पताल र निजी गौर सेन्ट्रल अस्पतालका चिकित्सकलाई कारबाहीको माग राखेर पीडित परिवारले प्रशासन गुहारेका छन् ।

वीरगन्जबाट शव ल्याएर पीडितले घटनाको निष्पक्ष छानबिन र लापरबाहीमा संलग्न चिकित्सकलाई कारबाहीको माग राखेर जिल्ला प्रहरी गौरमा अनुरोध गरेका छन् । ‘मेरो भतिजा लालुको चिकित्सक पंकज साहले शल्यक्रिया होइन हत्या गरेको हो,’ काका देवेन्द्रले भने, ‘यसलाई शल्यक्रिया भन्न मिल्दैन यो हत्या नै हो । गौर प्रादेशिक अस्पतालबाट किन निजीमा रिफर गरियो । लापरबाहीमा संलग्न चिकित्सकलाई कारबाही हुनुपर्छ ।’

उनले शल्यक्रियामा संलग्न चिकित्सक फिरोज अन्जुम, पंकज साह र प्रादेशिक अस्पतालका घनश्याम ठाकुरविरुद्ध अनुसन्धान र कारबाहीका लागि जिल्ला प्रहरीलाई अनुरोध गरेका छन् । प्रादेशिक अस्पतालबाट बिरामीलाई निजीमा लगेपछि चिकित्सक पंकज साह त्यहाँ पुगेका थिए । उनले तत्कालै पेटको ठूलो हिस्सा चिरेर सिलाएको तस्बिर समाजिक सञ्जालमा भाइरल भएको थियो । चिकित्सक साह निजी गौर सेन्टर अस्पतालमा समेत कार्यरत थिए । त्यही कारण उनले बिरामीलाई वीरगन्ज रेफर गर्न छाडेर आफ्नैमा लगेको आरोप पीडित परिवारले लगाएका छन् ।