धनुषा — महोत्तरी जिल्ला अदालतका न्यायाधीश फणेश्वरी घिमिरलाई सर्वोच्च अदालतले काजसरुवा गरेको छ । अपहरण, शरीर बन्धक, कर्तव्य ज्यान र व्यक्ति बेपत्तासम्बन्धी मुद्दाको सुनुवाइका क्रममा विवादमा तानिएकी न्यायाधीश घिमिरेलाई सर्वोच्च अदालतले काजसरुवा गरेको महोत्तरी जिल्ला अदालतकी श्रेस्तेदार नुतन झाले बताइन् ।

न्यायाधीश घिमिरेको काज सरुवाको पत्र सोमबार साँझ सर्वोच्च अदालतबाट आएको थियो । मंगलबार न्यायाधीश घिमिरे काठमाडौं गइसकेकी छिन् । 

जिल्ला अदलातमा हत्या मुद्दाको नियमित सुनवाइका क्रममा इजलास नम्बर-६ की न्यायाधीश घिमिरे र अदालतका कर्मचारी मृतक झाको घरमा पुगेर कुराकानी गरेपछि विवादित बनेकी थिइन् । न्याय परिषद्ले सोमबार घिमिरेको इजलासमा रहेको महोत्तरीको पिपरा सहोडवाका मुसाफिर झा र गीतादेवी झा हत्या मुद्दाको मिसिलको प्रमाणित प्रतिलिपि  मागेको थियो । 

थुनामा रहेका मुख्य आरोपी भारतीय नागरिक हरेन्द्र ठाकुर हत्यामा संलग्न भएको कुनै प्रमाण नरहेको बताएको सार्वजनिक भएपछि न्यायाधीश घिमिरे विवादमा मुछिएकी हुन् । घरमै गएर न्यायाधीशले गरेको संवाद र इजलास नं. ६ मै लगातार ५ पटक पेसी पर्नु, अन्य इजलासमा पेसी पर्दा अभियुक्तहरूका तर्फबाट पेसी सार्ने घटनाक्रमले पनि उनी विवादमा मुछिएकी हुन् ।