जनकपुर — गत माघ ३ गते पित्तथैलीको शल्यक्रिया गराएकी सर्लाही हरिपूर्वा नगरपालिका–५ की पविताकुमारी राय यादव अझै अचेत छिन् । उनी बेहोसीमै हुँदा उनको उपचार गरिएको जनकपुरस्थित मुस्कान अस्पताल भने दर्ता बिना नै सञ्चालनमा रहेको भेद खुल्यो ।

अस्पतालका डा. ज्ञानकुमार साह नेतृत्वको टिमले शल्यक्रिया गरेपछि होस नखुल्दा यादवलाई लामो समय भेन्टिलेटरमा राखेको अस्पतालले अन्त लैजान रेफर गरिदियो । त्यसपछि जनकपुरकै जानकी हेल्थकेयरमा सिटिस्क्यान गर्दा स्नायुमा समस्या देखिएको भन्दै यादवलाई थप उपचारका लागि काठमाडौं मेडिकल कलेजमा भर्ना गरिएको छ । त्यहाँ पनि उनको भेन्टिलेटरमा राखेर उपचार भइरहेको छ ।

उपचारमा बदमासी र चर्को शुल्क असुल्ने आरोप खेपिरहेको मुस्कान अस्पताल दर्ता बिनै सञ्चालनमा आएको पाइएको छ । यो मात्र होइन यहाँका अधिकांश निजी अस्पतालहरु दर्ताबिनै सञ्चालित छन् । 

बिरामीको जीवनसँग खेलवाड हुन थालेपछि मधेश प्रदेशका मुख्यमन्त्री सतिशकुमार सिंह अहिले आफैं निरीक्षणमा लागिपरेका छन् । मुख्यमन्त्रीको निरीक्षणपछि निजी अस्पतालमा बिरामीमाथि हुने लापरबाही र अस्पतालका गुणस्तरीयताको विषय खुल्न थालेका छन् । 

अनुगमनका क्रममा मुख्यमन्त्री सिंहले अवैध र अनधिकृत सञ्चालित जनकपुरका दुई निजी अस्पताललाई त्यहाँ भर्ना रहेका बिरामीलाई अन्य अस्पतालमा सार्न निर्देशन दिए । पिडारीचोकस्थित जनकपुर मधेश हस्पिटल र रामानन्द चोकस्थित जनकपुर गोल्डेन अस्पतालका सञ्चालकलाई अस्पताल बन्द गरी अस्पताल सञ्चालनका लागि अनुमति लिने प्रक्रियामा जान निर्देशन दिए । 

यादवको शल्यक्रिया गर्ने मुस्कान अस्पताल अहिले बन्द गरिएको छ । यस्तै निर्देशन अटेरी गर्ने जनकपुरको भ्रमरपुराचोकस्थित जनकपुर मोर्डन हस्पिटलका सञ्चालक रामभरोस महतोलाई धनुषा प्रहरीले बिहीबार साँझ पक्राउ गरेको छ ।

जनकपुरको जिरोमाइलस्थित ज्योति आँखा अस्पताल र रामानन्द चोकस्थित सुरक्षा अस्पताललाई आवश्यक कागजातसहित मुख्यमन्त्री तथा मन्त्रिपरिषद्को कार्यालयमा हाजिर हुन भनिएको छ । जनकपुरकै वंशी चोकस्थित हिरा अस्पताललाई भने आकस्मिक कक्षको बेड संख्या कम गर्न भनिएको छ । 

सेवा सञ्चालन अनुमति प्राप्त स्वास्थ्य संस्थाले कूल शैय्याको १० प्रतिशत मात्र आकस्मिक कक्षमा राख्नसक्ने प्रावधान छ । तर, जनकपुरका अधिकांश अस्पतालले अनुमति प्राप्त बेड संख्याको अनुपात नमिलाई बढी संख्यामा आकस्मिक कक्षमा बेड राखेको पाइएको छ । 

जनशक्ति, भौतिक पूर्वाधार, उपकरण, सरसफाइ लगायतका मापदण्ड पूरा नगरी जनकपुरमा बग्रेल्ती खोलिएका निजी अस्पताललाई बन्द गर्न मुख्यमन्त्री सिंहले लगातार दबाब बढाएका छन् । मुख्यमन्त्री सिंह, मधेश प्रदेशका स्वास्थ्य तथा जनसंख्या मन्त्री सत्रुधनप्रसाद सिंह, स्वास्थ्य मन्त्रालयका अधिकारी र सुरक्षा अधिकारीको लगातारको निरीक्षणमा जनकपुरका अधिकांश निजी अस्पताल संघ, प्रदेश र स्थानीय सरकारबाट स्वीकृति नलिइकनै सञ्चालनमा रहेको खुलेको हो ।