राजविराज — पैसा दोब्बर पारिदिने भन्दै रकम लिएर ठगी गरेको आरोपमा सप्तरी प्रहरीले एकजनालाई आइतबार नियन्त्रणमा लिएको छ ।
तिलाठी कोईलाडी गाउँपालिका-६ का हनुमानी भनिने रामबहादुर रजकलाई प्रहरीले नियन्त्रणमा लिएको हो ।
सर्वसाधारणसँग रकम लिएर दोब्बर रकम बनाइदिने भन्दै ठगी गर्दै आएको आरोप रजकमाथि छ ।
लामो समयदेखि सप्तरीमा रजकले ठगी गरिरहेको आरोप लाग्दै आए पनि प्रहरीमा भने उजुरी पर्ने गरेको थिएन । पीडितले जिल्ला प्रहरी कार्यालयमा किटानी जाहेरी दिएपछि जिल्ला अदालतबाट पक्राउ अनुमति लिई रजकलाई आइतबार गाउँबाटै नियन्त्रणमा लिइएको प्रहरीले जनाएको छ ।
सोमबार जिल्ला अदालतमा म्याद थपपश्चात् पत्रकार सम्मेलन गरेर विस्तृत जानकारी दिइने सप्तरी प्रहरीले बताएको छ ।
