डिभिजन वन कार्यालय प्रमुख नारायणदेव भट्टराईले किसानसँग समन्वय गर्ने, बाँदर मकैबारीमा पस्न थालेको देखे, होहल्ला गर्दै किसानलाई जानकारी दिने र किसान–हेरालु मिलेर मकै जोगाउनु ध्यान दिनुपर्ने बताए । 

दुई महिनासम्म हेरालुले बाँदरको समूह कता छ, कता जाँदैछ नियमित निगरानी राख्ने, कृषकलाई बेलाबेलामा सूचना दिने, बाँदरले बाली नोक्सान गरिदियो भने त्यसको अभिलेख राख्ने र सम्बन्धित वडा कार्यालयमा जानकारी गराउने कामको जिम्मेवारी हेरालुको रहेको वन कार्यालयका सूचना अधिकारी केशर खड्काले बताए । 

बाँदरलाई गाउँबस्ती र खेतीयोग्य क्षेत्रबाट धपाएर प्राकृतिक बासस्थानतर्फ धपाउने काम उनीहरुको रहने छ । हेरालुलाई आवश्यक सामग्री र पोसाक उपलब्ध गराएर पठाइएको छ । 

नियुक्ति पाएका वन हेरालु चन्द्रमान श्रेष्ठले वनले दिएको जिम्मेवारी अनुसार काम सफलतापूर्वक निभाउने बताए । ‘वन्यजन्तुलाई सुरक्षित स्थानमा पुर्‍याई किसानको खेतीबाली जोगाउने जस्तो महत्त्वपूर्ण जिम्मेवारी हाम्रो काँधमा आएको छ,’ उनले भने, ‘त्यो पूरा गर्छु । यस कामले गाउँका किसानसँग पनि राम्रो सम्बन्ध होला भन्ने आशा छ ।’ नियुक्ति पाएका २६ जना हेरालुलाई वन कार्यालयले क्षेत्रफल तोकेर जिम्मेवारी दिएको छ ।