बर्दिया — बर्दिया सदरमुकाम रहेकै पालिकामा अनुमति नलिएर औषधि पसलहरु संचालन गरेको पाइएको छ । गुलरिया नगरपालिकाभित्र मात्रै लुम्बिनी प्रदेश स्वास्थ्य विभागबाट इजाजत नै नलिई ५८ वटा पोलिक्लिनिक, फार्मेसी, प्याथोलोजीलगायत निजी अस्पताल अवैधरुपमा सञ्चालनमा रहेको खुलेको छ । ५ वटा त नामै नभएका औषधि पसल सञ्चालनमा रहेको गुलरिया नगरपालिकाको स्वास्थ्य शाखाले जनाएको छ । 

गुलरिया–११ मा एक भारतीय नागरिकले अवैधरुपमा औषधि पसल सञ्चालन गर पनि नियमक निकायले कुनै चासो नदिएको गुलरियाका सामाजिक अभियन्ता राजकुमार बर्माले बताए । वर्षौंदेखि अवैधरुपमा औषधि पसल सञ्चालन गरेको देखिए पनि कसैबाट कारवाही नभएको उनले बताए ।  

भारतसँग जोडिएको गुलरिया–९ र १० मा केही घरमै पनि अवैधरुपमा औषधि पसल सञ्चालनमा रहेको स्थानीय बताउँछन् । यस क्षेत्रमा ८/१० वटा अवैध औषधि पसल भएकोले नियमक निकायले कारवाही प्रक्रिया अघि बढाउन आवश्यक रहेको गुलरिया–१० का वडाध्यक्ष हरिप्रसाद पासीले बताए । आफु दुई कार्यकाल वडाध्यक्ष भएयता अवैधरुपमा सञ्चालन गरिएका औषधि पसलको कतैबाट अनुगमन नभएको उनले जनाए ।

गुलरियामा दर्ता र ईजाजत प्रक्रिया पूरा नगरी करोड बढी लगानीमा सञ्चालनमा आएको सिटी अस्पताल पनि छ । गुलरिया नगरपालिका स्वास्थ्य शाखा प्रमुख शिवकुमार चौधरीले सिटी अस्पताललाई स्वास्थ्य मापदण्ड पूरा गरी दर्ता गर्न पत्रचार गरेको बताए । ‘सदरमुकामको वडा ६ क्षेत्रमा सबैभन्दा बढी ईजाजत नलिई औषधि पसल सञ्चालमा छन्,’ उनले भने, ‘५ वटा नामै नभएका र नक्कली डाक्टरमाथि निगरानी बढाई ३५ दिनभित्र स्वास्थ्य मापदण्ड अनुसार दर्ता गर्न निर्देशन दिएका छौं ।’ 

सिटी अस्पतालका सञ्चालकले भने नगरपालिकाबाट अस्थायी अनुमति लिएको जनाएको छ । करिब दुई वर्षअघि स्थापना भएको सिटी अस्पतालका सञ्चालक डाक्टर मुकेश झाले ६ महिनाभित्र स्वास्थ्य मापदण्ड पूरा गरी दर्ता गरिने बताए । सिटी अस्पताललाई गत वर्ष नै स्वास्थ्य मापदण्ड पूरा गरी सञ्चालन गर्न पालिकाले पत्रचार गरेको थियो ।