पर्याप्त वर्षा नहुँदा यसपाली असार तेस्रोसातासम्म बर्दियामा ५० प्रतिशत मात्र रोपाइँ भएको छ।
What you should know
बर्दिया — असार पहिलो सातामै रोप्नुपर्ने ब्याड छिप्पिन थालेपछि मधुवन नगरपालिका–३ धनौराकी मनकला थारु जेनतेन रोपाइँ गर्न उखेल्न थालेकी छिन् । खेत सुक्खा भए पनि ब्याड बिग्रिने डरले उनले चाँडो राेपाइँ सक्नु परेको छ। पानी नपरेपछि उनले बोरिङको व्यवस्थापन गरेर खेत रोप्ने तयारी गरेकी छन् ।
रोपाइँका लागि चाहिने जति वर्षा नभएपछि धनौराकै रामशंकर थारु आकाश हेर्दै बसिरहेका छन् । पर्याप्त पानी नपर्दा उनलाई पनि रोप्न ठिक्क भएको ब्याड बिग्रिने चिन्ता छ ।
बर्दियामा असार १५ मा लगातार ५ घण्टा वर्षा भएको थियो । त्यसयता दिन बिराएर केही भागमा थोरै वर्षा भइरहे पनि रोपाइँ लागि पर्याप्त नभएको बढैयाताल गाउँपालिका–८ का किसान बासु चौधरीले बताए । पर्याप्त वर्षा नहुँदा बर्दियामा असार २२ सम्म करिब ५० प्रतिशत मात्र धान रोपाइँ भएको छ ।
सबैभन्दा बढी रोपाइँ कर्णाली नदीले सिंचित क्षेत्र मानिएको राजापुर नगरपालिका र गेरुवा गाउँपालिकामा भएको एकीकृत कृषि तथा पशुपन्छी विकास कार्यालय बर्दियाले जनाएको छ । यस क्षेत्रमा करिब ७५ प्रतिशत भएको छ ।
मधुवन, ठाकुरबाबा, बारबर्दिया, बासगढी, गुलरिया नगरपालिका र बढैयातालमा गाउँपालिकामा करिब ३५ प्रतिशत रोपाइँ भएको एकीकृत कृषि तथा पशुपन्छी विकास कार्यालय बर्दियाकी प्रमुख कमला अधिकारीले बताइन् । आकाशे पानीको भरमा रहेका खेतमा रोपाइँ प्रभावित भएको उनले बताइन् । अझै पनि एक/दुई दिन झरी परे असारभित्रै शतप्रतिशत रोपाइँ हुने उनले बताइन् । बर्दियामा ५० हजार १ सय हेक्टरमा धान खेती हुने गरेको छ ।
बबई सिँचाइ आयोजनाको मूल नहरमा पानी कम हुँदा रोपाइँ प्रभावित भएको छ । बबई खहरे खोला भएका कारण आकाशे पानीको भरमा जलस्तर घटबढ हुने गरेको छ । भेरी, बबई डाइभर्सनको काम सम्पन्न नभएसम्म १२ महिना सिँचाइ सुविधा उपलब्ध गराउन नसकिने आयोजना प्रमुख गोपाल शर्माले बताए । भेरी, बबई डाइभर्सन अबको दुई वर्षभित्र सम्पन्न हुने लक्ष्य रहेको छ ।
