बर्दिया — यस वर्ष असारको मध्येसम्म पनि मनसुनी वर्षा नहुँदा बर्दियामा १८ प्रतिशत मात्र धान रोपाई सकिएको छ । उक्त रोपाई पनि कर्णाली नदी सिंचाई क्षेत्र राजापुर नगरपालिका र गेरुवा गाउँपालिकामा भएको एकिकृत कृषि तथा पशुपंक्षी विकास कार्यालय, बर्दियाले जनाएको छ ।

बर्दियाको ठाकुरबाबा नगरपालिकाको केही ठाउँ बाहेक ६ वटा पालिकामा रोपाई नभएको एकिकृत कृषि तथा पशुपंक्षी विकास कार्यालय, बर्दियाका सूचना अधिकारी फिर्तुमान चौधरीले बताए ।

१५ असारमा ‘जलवायु मैत्री प्रविधि, धानमा आत्मनिर्भरता र सम्बृद्धि’ भन्ने नारासहित धान दिवस तथा रोपाई महोत्सवको तयारी हुँदै गर्दा बर्दियाको झण्डै ८२ प्रतिशत धान खेत बाँझै छ ।

वर्षा नहुँदा जिल्लाको पूर्वी क्षेत्रमा जमिन सुखेर हाते पम्पबाट पानी आउन छाडेको छ । लामो समयदेखि पानी नपर्नु र बबई लगायत खोलामा पानी कम हुँदा सिचाई अभावमा रोपाई हुन नसकेको बढैयाताल गाउँपालिकाका अध्यक्ष हिमालय त्रिपाठीले बताए ।

तीन साताअघिसम्म जमिनदेखि ४० देखि ५० फिट मुनी हाते पम्पबाट पानी आउने गरेकोमा अहिले १ सय १० फिटसम्म गहिरो खन्दा पनि पानी आउन सकेको छैन,’ त्रिपाठीले भने, ‘पानी अभावमा सिंचाई नहुँदा रोपाई गर्न सकिएको छैन ।’

बासगढी नगरपालिकाको उत्तरी क्षेत्र र बढैयाताल गाउँपालिकामा खानेपानीका धारा समेत सुकेको स्थानीयले बताए । ‘धानको ब्याड राख्ने त टाढाको कुरा भयो, हाते पम्पबाट समेत पानी आउन छाडेको दुई साता भयो,’ बढैयाताल–४ का किसान भुवनेश्वर थारुले गुनासो गरे, ‘पम्पबाट पानी नआएपछि धान ब्याडसमेत राख्न सकिएको छैन ।’

बासगढीमा पनि लामो समयको खडेरीले रोपाई गर्न नपाएको मेयर खड्गबहादुर खड्काले बताए । ‘हाते पम्प सुक्दा स्थानीयलाई पानीको समस्या परेको छ,’ उनले भने, ‘विशेष गरि पालिकाको वडा २ र ४ मा हाते पम्पबाट पानी आउन छाडेको दुई साता भयो ।’