दाङ — अधिकांश स्थानीय तहका उपप्रमुख तथा उपाध्यक्षले बुधबार बजेट प्रस्तुत गरेका छन् । बजेट प्रस्तुत गर्ने शैली संघ, प्रदेशदेखि स्थानीय तहसम्म एउटै छ, झोलामा बजेटको पुस्तक राखेर रिबनले बाँध्ने । राप्ती र गढवा गाउँपालिकामा भने बुधबार फरक शैलीमा बजेट आयो– त्यो हो ढकियामा बजेट ।

राप्ती गाउँपालिका उपाध्यक्ष कमलापती चौधरी र गढवा गाउँपालिका उपाध्यक्ष शारदाकुमारी चौधरी ढकियामा बजेट बोकेर सभामा पसे । थारू पोसाकमा सजिएका उनीहरूले ढकियाबाट निकालेर बजेट पाठ गरे । ढकिया थारू समुदायको महत्त्वपूर्ण हस्तकला सामग्री हो । स्थानीय कच्चा सामग्रीको प्रयोग गरेर उनीहरू ढकिया बुन्छन् र यस्तै विशेष समारोहमा प्रयोग गर्छन् ।

ढकिया विवाह, पूजापाठ, चाडपर्व र कुनै विशेष समारोहमा शोभा बढाउन प्रयोग हुने गर्छ । थारू महिलाहरू ढकिया टाउकोमा राखेर समारोहको रौनक थप्ने गर्छन् । थारू समुदायको पहिचान झल्किने ढकियामा बजेट राखेर राप्ती र गढवाका उपाध्यक्षहरूले नैलो कामका सुरुवात गरेका छन् ।

थारू समुदायको प्रतिनिधित्व गर्ने उपाध्यक्षहरूले ढकियालाई स्थानीय सरकारको बजेट प्रस्तुत गर्ने माध्यम बनाएर आफ्नो समुदायको पहिचान झल्काएका हुन् । औपचारिक ब्रिफकेसको सट्टा थारू समुदायको उत्पादनलाई प्राथमिकता दिएको गढवाकी उपाध्यक्ष चौधरीले बताइन् ।

‘हामीले अरूको नक्कल गर्नुपर्छ भन्ने छैन । हाम्रो समुदायको सीप र कलाले बुनेको ढकियालाई चिनाउने काम गरेका छौं,’ उनले भनिन्, ‘हामी हरेक शुभकार्य र समारोहमा ढकिया प्रयोग गर्छौं भने बजेट बोक्न किन प्रयोग नगर्ने ? यही सोचेर ढकियामा बजेट बोकेको हो ।’

गढवा गाउँपालिकाले ८२ करोड ६४ हजार रूपैयाँ र राप्ती गाउँपालिकाले ७५ करोड ४ लाख ९६ हजार रूपैयाँको बजेट प्रस्तुत गरेका छन् । गढवा गाउँपालिकाले कृषि भण्डारण, शीत भण्डार, पशुपालन, सिँचाइ र युवा उद्यमशीलता कार्यक्रमलाई प्राथमिकतामा राखेको उनले बताइन् ।