बर्दिया — बारबर्दिया नगरपालिका–४ झोलुङ्गे पुल जाने बाटोमा निर्माणाधीन कल्भर्टको वनका कर्मचारीले सरिया काटेका छन् । डिभिजन वन कार्यालयका कर्मचारीले बिहीबार निर्माणाधीन कल्भर्टका सातवटा सरिया काटेका हुन् । 

सरिया काटेको जानकारी पाउनासाथ स्थानीय सर्वसाधारणले अवरोध गरेपछि वनका कर्मचारीको भागाभाग भएको थियो । बैरियाघाटस्थित बबई नदीमा रहेको झोलुङ्गे पुल जाने बाटोमा खाल्डो रहेको हुँदा बर्खामा आवतजावत गर्न सर्वसाधारणलाई सास्ती व्यहोर्नु पर्छ ।

पराम्परादेखि चलनचल्तीमा रहेको बाटोमा कल्भर्ट निर्माण गर्दा वनले भत्काउन खोजेको बारबर्दिया नगरपालिका–४ बैरिया गाउँका बडघर राधेश्याम थारुले बताए । ‘बघैला र जिराह सामुदायिक वनको सिमानामा पर्ने उक्त बाटो पराम्परादेखि चलनचल्तीमा छ,’ उनले भने, ‘पुर्खादेखि चलनचल्तीको बाटोमा अघिल्लो सातादेखि कल्भर्ट निर्माण सुरु भएको हो । अहिले वनका कर्मचारीले दादागिरी शैलीमा रोक्न खोजेका छन् ।’ हामी गाउँलेले २०४४ सालमा वृक्षारोपण गरी बनाएको वन हो । शुक्रबार यस विषयमा तीन/चार गाउँका स्थानीय जम्मा भएर डिभिजन वन कार्यालयमा जाने तयारी भइरहेको उनले जनाए ।