गर्मी बढेसँगै भेरी अस्पतालमा पखाला, निमोनिया, ज्वरोका बिरामीको संख्या बढेको चिकित्सकले बताएका छन् । गर्मीबाट सबैभन्दा बढी बालबालिका तथा बृद्धबृद्धा बढी प्रभावित भएको भेरी अस्पतालका इमरजेन्सी कक्षका इन्चार्ज संकेत रिसालले बताए । गर्मी बढेसँगै नेपालगन्जमा ‘हिट स्ट्रोक’ अर्थात् ‘लू’ लाग्ने जोखिमसमेत बढ्दै गएको उनले बताए ।

दिउँसो तापक्रम उच्च भएका बेला चल्ने तातो हावाले दैनिक ज्यालादारी तथा कडा श्रम गर्ने व्यक्तिलाई लु लाग्ने जोखिम बढेको चिकित्सक रिसालको भनाइ छ । बढ्दो गर्मीबाट जोगिन फलफूलको जुस, पानीलगायतका स्वच्छ तरल पर्दाथ सेवनलाई बढाउनुका साथै काम नभए दिउँसोको समयमा घरबाहिर नस्किन उनले सुझाए ।

भेरी अस्पतालमा ओपिडी खुलेका बेला दैनिक ५० जना हाराहारीमा मात्रै बिरामी उपचारका लागि आउने गरेका थिए । तर अहिले बिरामीको चाप ह्वात्तै बढेको छ । बिहीबार सार्वजनिक बिदा परेकाले २०० जना र शुक्रबार दिउँसो २ बजेसम्म ६९ जनाले इमरजेन्सीमा उपचार गराएका थिए । शनिबार पनि इमरजेन्सीमा बिरामीको चाप भइरहेकाे अस्पतालले जनाएको छ । अस्पतालको इमरजेन्सी वार्डअन्तर्गत प्यारामेडिसिन इन्चार्ज मदन श्रेष्ठले गर्मी बढेसँगै ज्वरो, डिहाइड्रेसन, झाडापखालालगायतका बिरामी बढ्दै गएको बताए ।

जल तथा मौसम विभाग कोहलपुरका प्रमुख रामप्रसाद अवस्थीका अनुसार  पछिल्लो समय तराईका जिल्लामा अत्यधिक गर्मी बढ्दै गएको छ । यसले सबैभन्दा बढी विद्यालयका बालबालिका, दैनिक काम गर्ने श्रमिक बढी  प्रभावित भएको उनले बताए । अवस्थीले जेठ ७ मा यस वर्षको सबैभन्दा बढी ४१ दशमलव ५ डिग्री सेल्सियस तापक्रम पुगेको थियो । बुधबारयता भने तापक्रम घटिरहेको उनको भनाइ छ । अवस्थीका अनुसार सन् २०१२ जुन १४ मा नेपालगन्जमा सबैभन्दा बढी ४५ डिग्रीसम्म तापक्रम पुगेको थियो ।