अर्घाखाँची — लुम्बिनी प्रदेश राजधानी दाङको देउखुरी जोड्ने गच्छे–भालुवाङ सडक निर्माण सुरु भएको २७ वर्षपछि कालोपत्र सुरु गरिएको छ । 

सदरमुकाम सन्धिखर्कस्थित गच्छेबाट ढिकुराको गाै‌ंडाकोटसम्म ४ किलोमिटर सडक अम्मर निर्माण सेवाले धमाधम कालोपत्रको काम गरिरहेको छ । यहाँ साढे पाँच मिटर चौडाइको सडक कालोपत्र भएको हो । योसहित १५ किलामिटर सडक कालोपत्र गर्न ठेक्का भएको सडक पूर्वाधार विकास कार्यालय प्रमुख गोपी पुनले बताए । कालोपत्रका लागि सुरु बजेट साढे आठ करोड रुपैयाँ बजेट विनियोजन भएको छ । 

‘गच्छे–भालुवाङसम्मको सडकको दुरी ४८ किलोमिटर मध्ये १५ किमी कालोपत्र गर्न ठेक्का भएको हो,’ उनले भने, ‘बाँकी सडक कालोपत्र गर्न तयारीको काम अगाडि छ । आगामी वर्ष बजेट पारेपछि कालोपत्र हुन्छ ।’ 
यो सडक कालोपत्र हुन थालेपछि जिल्लाको दक्षिणी भेगको ग्रामीण क्षेत्र सहरसँग सहज पहुँच हुने आशा जागेको छ ।

यो सडक २०५६ सालमा तत्कालीन जिल्ला विकास समितिले बजेट विनियोजन गरेरै सडकको सुरुवात गरिएको हो । त्यतिबेला अर्घाखाँची सदरमुकाम सन्धिखर्कलाई पश्चिमी भेग दाङ, बाँके, बर्दियासम्म पहुँच पुर्‍याउन सो सडक निर्माण गर्न लागिएको थियो । अर्घाखाँचीको दक्षिणी क्षेत्र धनचौर, जलुके, जुकेना, सिद्धारा गाउँका स्थानीयलाई दाङको भालुवाङ बजार र सन्धिखर्कमा आउजाउ गर्न सहजताको त्यतिबेला तत्कालीन जिल्ला विकास समितिका सभापति पिताम्बर भुसालको पहलमा सडक सुरु भएको हो । २७ वर्षपुग्दा पनि हरेक वर्ष बजेट अभावले सडक निर्माणको काम पूरा भएको छैन । 

लुम्बिनी प्रदेश राजधानी देउखुरी सरेपछि गच्छे–भालुवाङ सडकलाई महत्वको रुपमा हेरिए पनि बजेट अभावले द्रुत गतिमा काम हुन सकेको छैन । यो सडक निर्माण सम्पन्न भए प्रदेश राजधानी आउजाउका लागि अर्घाखाँचीसहित पाल्पा, गुल्मी जिल्लावासीलाई गच्छे–भालुवाङ सडक नै सहज हुनेछ ।

अहिले प्रदेश राजधानी आउजाउको लागि सन्धिखर्क–गोरुसिंगे सडक रुटबाट हुँदै पूर्वपश्चिम महेन्द्र राजमार्गको यात्रा गर्नुपर्छ । सो सडक सबै कालोपत्र सम्पन्न भएपछि आधा दुरी छोटो हुन्छ । सन्धिखर्क–गोरुसिंगे–भालुवाङ सडक १ सय २४ किलोमिटर दुरी छ । गच्छे–भालुवाङ ४८ किमी रहेको छ । ‘पर्याप्त बजेट भए दुई वर्षभित्रमा सबै सडक कालोपत्र गरेर सकिन्छ,’ पुनले भने, ‘बजेट थोरै भएपछि काम नदेखिएको हो । अहिले कालोपत्र भएपछि यस क्षेत्रका स्थानीयमा उत्साह जागेको छ ।’ त्यसको लागि १ अर्ब बजेट चाहिने उनले बताए । बजेट कम हुनु र धनचौरमा रहेको साप्रे भीर काटेर सडक बनाउन धेरै समय र बजेट खर्च भएको छ । ‘दक्षिण क्षेत्रको दुर्गम वस्तीलाई जिल्ला सदरमुकाम र पश्चिम क्षेत्रको भालुवाङसँग पहुँच पुर्‍याउन गच्छे–भालुवाङ सडकको अवधारणा अघि सारेका हौं,’ तत्कालीन जिल्ला विकास समितिका सभापति पिताम्बर भुसालले भने, ‘पहुँचका कारण यो सडकको राजनीतिक नेतृत्वले पर्याप्त बजेट पार्नमा विगतमा चासो दिएन । पूर्व–पश्चिमको यो वैकल्पिक मार्ग हो ।’