बुटवल — उच्च अदालत तुलसीपुर बुटवल इजलासले श्रव्यदृश्यमार्फत इजलासमा बहस सुरु गरेको छ । बुटवल इजलासमा त्यस्तो अभ्यास गरिएको हो ।

उच्च अदालतको बुटवल इजलासमा मंगलबार हक कायम दुषित दोहोरो दर्तासमेतका ५ थान मुद्दामा बहस भएर आदेशसमेत भएको छ । उच्च अदालत बुटवलका मुख्य न्यायाधीश वासुदेव आचार्य र तेजनारायण पौडेलको संयुक्त इजलासमा भएको बहसमा वरिष्ठ अधिवक्ता तीर्थराज बस्यौला र अधिवक्ता वर्षा भट्टराईले ‘भिडियो कन्फेरेन्सिङ’मार्फत बहस गरेका थिए । उनीहरू दुवै जनाले काठमाडौं जिल्लाबाट सहभागी भएर बहस गरेको अदालत प्रशासनले जनाएको छ ।

काठमाडौंबाट बहसमा सहभागी भएकी अधिवक्ता वर्षा भट्टराईले उच्च अदालत तुलसीपुर बुटवल इजलासले ‘भिडियो कन्फेरेन्सिङ’सम्बन्धी गत चैत २५ गते नै सूचना जारी गरेर जानकारी गराएको र आफूहरूले सोमबार त्यसका लागि निवेदन दिएर मंगलबारको बहसमा काठमाडौंबाटै सहभागी भएको बताइन् ।

‘यसलाई न्याय क्षेत्रको इतिहासमा प्रविधिको फड्को नै मान्न सकिन्छ,’ उनले भनिन्, ‘बहस पैरवी मात्र नभएर बकपत्र, थुनछेक बहस लगायतमा पनि भिडियो कन्फेरिन्सिङ प्रविधि ठूलै उपलसब्ध र उपयोगी हुनेछ ।’ यसले विदेशमा भएको विपक्ष वा साक्षीका लागिसमेत उपलब्धिमूलक हुने उनले बताइन् । ‘यो निकै राम्रो सुरुवात हो,’ उनले थपिन् ।

उच्च अदालत बुटवलका सूचना अधिकारी थिरेन्द्रकुमार सुवेदीका अनुसार 'भिडियो कन्फेरेन्सिङ'बाट भएको बहस पैरवीपछि वादी नवलपरासीको भृकुटी बहुउद्देश्यीय सहकारी संस्था र प्रतिवादी प्रेमचन्द्र तेली र मन्तिरप्रसाद तेली रहेको हक कायमसम्बन्धी मुद्दामा नवलपरासी जिल्ला अदालतबाट २०८२ जेठ १२ मा भएको फैसला सदर गरेको छ । उच्च अदालतबाट पहिलो पटक श्रव्यदृश्यमार्फत बहस पैरवी गरेर मुद्दाको फैसला गरेको बताए ।