दाङ — लुम्बिनी प्रदेशका मुख्यमन्त्री चेतनारायण आचार्यले धार्मिक स्थललाई पर्यटनसँग जोडेर समृद्धि हासिल गर्नुपर्ने बताएका छन् ।

तुलसीपुर उपमहानगरपालिका–१३, अम्बापुरस्थित मदन बाबा भक्तिकेन्द्रमा सोमबार आयोजित अन्तर्क्रिया कार्यक्रमलाई सम्बोधन गर्दै आचार्यले प्राचीन सभ्यता र मानव विकाससँग जोडिएका स्थलहरूको प्रवर्द्धनबाटै प्रदेशले समृद्धि हासिल गर्ने धारणा व्यक्त गरेका हुन् ।

उनले लुम्बिनी प्रदेशलाई देवभूमि, तपोभूमि र ज्ञानको भण्डारका रूपमा चित्रण गर्दै यस क्षेत्रका धार्मिक तथा सांस्कृतिक सम्पदालाई पर्यटनसँग जोड्ने योजनाअनुसार सरकारले काम अघि बढाएको जानकारी दिए । ‘धार्मिक पर्यटन विकासका पर्याप्त आधार छन्,’ उनले भने, ‘आध्यात्मिक, धार्मिक तथा सांस्कृतिक पर्यटन प्रवर्द्धनका लागि प्राचीन सम्पदाको संरक्षण अपरिहार्य छ ।’

कार्यक्रममा प्रदेशका पूर्वमुख्यमन्त्री डिल्लीबहादुर चौधरीले दाङको समग्र विकासका लागि ऐतिहासिक तथा धार्मिक स्थलहरूको संरक्षण र प्रवर्द्धन आवश्यक रहेको बताए । उनले सरयू नदी द्वापर युगसँग सम्बन्धित रहेको र सुकौरास्थित दंगीशरण दरबारमा छैटौं शताब्दीका प्राचीन सामग्री फेला परेको स्मरण गराउँदै यस क्षेत्रको पहिचान र विकासमा ध्यान दिनुपर्ने धारणा व्यक्त गरे ।