बर्दिया — अत्यधिक गर्मीसँगै चलेको तातो हावाले बर्दियाको जनजिवन प्रभावित बन्दै गएको छ । बिहानैदेखि तातो हावासँगै चर्को घामले अत्यावश्यक काम बाहेक बाहिर निस्कने अवस्था छैन ।

दिउँसो सहर, बजार र ग्रामीण सडकमा मानिसको चहलपहल निकै कम देखिएको छ । अथ्यधिक गर्मीले सबैभन्दा बढी ज्याला मजदुरी गर्ने प्रभावित भएका छन् । बारबर्दिया नगरपालिका–१० का मजदुर ४० वर्षीय फकिरे थारुले दैनिक ज्याला नगरे खान नपुग्ने भएकोले गर्मी बढे पनि काम गर्न बाध्यता रहेको बताए । ‘हामीलाई अत्यधिक गर्मी, जाडो भए पनि काम गर्नुपर्छ, यस पालीको गर्मी भने अचाक्ली छ ।’

जल तथा मौसम विभागका मौसमविद् हरिप्रसाद दाहालले तीन दिनसम्म गर्मी यथावत रहने बताए । उनले दिउँसोको अधिकतम तापक्रम ३९ देखि ४१ डिग्रीसम्म रहने जनाए । ‘सडकमा हिँड्दा हिँड्दै कहाँ ढल्ने हो ठेगान छैन,’ ठाकुरबाबा नगरपालिका– ६९ वर्षीय किसान रामदिन थारुले बताए । ‘अत्यधिक गर्मीले सडक तातेको छ,’ उनले भने, ‘त्यसमा पनि चलेको तातो लुले रिगाटा लाग्छ । घर, जग्गा, सडक, लुगा जता छोयो उता तातो छ । पानी पनि तातो, पसिनाले एकछिन पनि छोड्दैन । कतिखेर ढाल्ने हो ।’