बुटवल — बुटवल उपमहानगर प्रहरीले सडक अतिक्रमण हटाउने र व्यवस्थित गराउने अभियानलाई दैनिक रूपमै निरन्तरता दिएको छ । पहिलो र दोस्रो दिन आक्रामक देखिएको नगरपालिका तेस्रो दिन शुक्रबार भने नरम देखिएको छ । 

नगरपालिकाले पहिलो दिन अस्पताल लाइन, भुड्की चोक र मिलन चोक क्षेत्रमा अनुगमन गरेको थियो । त्यस क्रममा भुड्की चोकमा भुड्की व्यवसाय गरिरहेका व्यवसायीका सामान तोडफोड गर्नेदेखि घरको पेटी र छानो हटाउने काम गरेको थियो । त्यस्तै, मिलन चोक क्षेत्रमा सडकमै रिकण्डिसन पसल खोलेर मोटरसाइकल राख्नेहरुको सामान उठाएको थियो । दोस्रो दिन बिहीबार अमरपथका सिरक डसना, राममन्दिर लाइनका फेन्सी र भाँडा पसल भएका क्षेत्रमा अनुगमन गरेको थियो । 

नगर प्रहरी, नेपाल प्रहरी, नगर प्रमुख खेलराज पाण्डे, उपप्रमुख सावित्रादेवी अर्याल, प्रमुख प्रशासकीय अधिकृत दीपक ज्ञवाली, पूर्वाधार शाखाका कर्मचारीसहित अनुगमनमा निस्किएको नगरपालिकाको टोली र व्यवसायीबीच धक्कामुक्कीकै अवस्था भएको थियो । व्यवसायी आक्रमणमा उत्रिएको भन्दै आक्रामक बनेका नगर प्रहरीहरूले व्यवसायीका सिरक, डसना, झोला, भाँडा वर्तनसमेत उठाएका थिए । तर, तेस्रो दिन शुक्रबार नरम रूपमा प्रस्तुत भएका नगर प्रमुख खेलराज पाण्डेले आवश्यकता अनुसार आक्रामक र नरम बन्ने बताए । ‘दोस्रो दिन व्यवसायीहरू नगर प्रहरी माथि नै जाइलाग्नु भयो, त्यसैले अलि बढी आक्रामक हुनुपरेको हो,’ उनले भने, ‘हामीले कसैको अनुहार हेरेका छैनौँ, बुटवललाई सुन्दर र अनुशासित व्यवसायी बस्ने सहर बनाउने उद्देश्य मात्र हो ।’ सूचना र माइकिङसमेत गरेर जानकारी दिँदा पनि अटेरी गरेपछि आक्रामक बन्नु परेको उनले बताए ।

नगरपालिकाका प्रमुख प्रशासकीय अधिकृत दीपक ज्ञवालीका अनुसार नगरपालिकाले १५ दिनअघि सूचना प्रकाशित गरेर फुटपाथ खाली गर्न निर्देशन दिएको थियो । त्यसअघि कार्यपालिका बैठकमा छलफल र निर्णय गरिएको थियो । ‘सूचनासँगै निरन्तर माइकिङ पनि गरेर जानकारी गराइएको थियो,’ उनले भने, ‘तर, पुराना व्यवसायी र रिकण्डिसन व्यवसायीहरूले अटेरी गरेपछि डोजर र त्रेनसहित बजारमा निस्किनु परेको हो ।’ अभियान तीन महिनासम्म निरन्तर चल्ने र त्यसपछि पनि अनुगमन जारी रहने उनले बताए ।

व्यवसायीहरूले भने नगरपालिका दादागिरी र गुण्डा शैलीमा आक्रमणमा उत्रिएको बताएका छन् । नगर प्रहरीले बुटवल अमरपथको थापा किचन, गौरीशंकर भाँडा पसल, सिटी ब्याग हाउसमा धरपकड नै गरेका थिए । नगर प्रहरीले थापा किचन र गौरीशंकरबाट दर्जनभन्दा बढी पसलबाट भाँडा, सिटी ब्याग हाउसबाट झोला, सिरक डसना पसलबाट डनलप, डसना, सिरकहरू उठाएका थिए । सिटी ब्याग हाउसका विजय रायमाझीले प्रहरीले सटर भित्रैसमेत पसेर सामग्री लुटेर लगेको बताए । ‘नगरपालिकाले गुण्डागर्दी शैली अपनाएको छ,’ उनले भने, ‘मैले घरको पेटीमा राखेको सामग्री हटाउँछु भन्दाभन्दै उठाएर टिपरमा हाल्यो ।’ अब राख्दैनौँ भनेर प्रतिबद्धता जनाउँदासमेत सुनुवाइ नगरी उठाएर लगेको उनको दाबी छ । उनले आफ्नो पसलबाट दुई दर्जन बढी झोला, पसलमा घाम छेक्न बनाइएको ४० हजार पर्ने पर्दा पनि भाँचेर लगेको उनले बताए । थापा किचनका सुरज थापाले पनि घरको पेटीमै राखिएका सामग्री केही समय पनि नदिई उठाएर लगेको गुनासो गरे ।