बुटवल — बुटवल उपमहानगरपालिकाले बजार व्यवस्थित गराउन, सडक पेटी खाली गराउने र जथाभावी राखिएका एवं पार्किङ गरिएका सवारी साधन उठाउन सुरु गरेको छ । मोटरसाईक, स्कुटी रिकन्डिसन व्यवसायीहरुले पैदल यात्रुका लागि निर्माण गरिएको सडकमै राखेर व्यापार गर्ने गरेको गुनासो गरेपछि नगरपालिकाले बुधबारदेखि सडक खाली गराउने र अतिक्रमण गरी निर्माण गरिएका संरचना भत्काउने अभियान सुरु गरेको हो । 

बुधबार बुटवलको सबै भन्दा व्यस्त सडक भुड्कीचोकमा डोजर चलाएर सडक पेटी अतिक्रमण गरिएका घर भत्काएको उपमहानगरले बिहीबार पनि बिहानैदेखि सडक पेटीमा राखिएका सवारीसाधनहरु त्रेनको प्रयोग गरेर उठाउन थालेको छ । उपमहानगरपालिकाले सडक किनार र फुटपाथ अतिक्रमण गरि सञ्चालन गरिएका व्यवसाय हटाउन भन्दै तीन दिनदेखि माइकिङ गर्दै सर्वसाधरणलाई जानकारी दिएको थियो । तर, व्यवसायी र घरधनीहरुले अटेरी गर्दै आएका थिए र सर्वसाधरणले पनि फुटपाथमै सामान राखेर व्यवसायी गर्दै आएका थिए । 

पटक पटक आग्रह गर्दा पनि अटेरी गरेपछि डोजर चलाउन बाध्य भएको र यो अभियान बुटवलका सबै बजार क्षेत्रमा निरन्तर रहने बुटवल उपमहानगरपालिकाका प्रमुख  खेलराज पाण्डेले बताए । ‘बुटवलको राजमार्ग चौराहादेखि गोलपार्कसम्म नै सडकको फुटपाथ कब्जा गरि व्यवसाय गर्ने परिपाटीको विकास हुँदै गयो,’ उनले भने, ‘त्यसैले बाध्य भएर कसैको अनुहार नहेरी डोजर चलायौं ।’ 

सर्वसाधरण सडकपेटीबाट सुरक्षित रुपमा पैदल हिंड्न पाउने अधिकार सुनिश्चित गर्ने र बुटवल बजारलाई व्यवस्थित गर्ने उद्देश्यसहित नगरपालिकाले अभियान सुरु गरेको उनले बताए । डोजर लगाउँने क्रममा पूर्वपश्चिम राजमार्गको ८२ फुट भित्रैको सडकमै सेफ्टीटंयाक्नी निर्माण गरेको समेत फेला परेको उनले बताए । 

फुटपाथ र सडक किनार कब्जा गरी थापिएका पसलका कारण अस्पताल लाइन, भुड्की चोक, पुष्पलाल पार्क सबैभन्दा बढी अस्तव्यस्त बनेको थियो । त्यस्तै बसपार्कदेखि कालिकानगरसम्म रहेको पूर्वपश्चिम राजमार्गको सर्विस लेन खण्डमा रिकण्डिसन व्यवसायीहरुका कारण सवारी आवतजावत र सर्वसाधरणको पैदल यात्रा नै अबरुद्ध हुने गरेको थियो ।

नगरपालिकाले त्यस्ता सबै स्थानमा डोजर चलाउने र सवारी साधन नियन्त्रणमा लिएर नगरपालिकामै लैजान सुरु गरेको नगरउपप्रमुख सावित्रा आचार्यले बताईन् । डोको र ठेलामा राखिएका तरकारी, फलफूल र कपडा पसलका कारण बिरामी लिएर आउने एम्बुलेन्सलाईसमेत अस्पताल भित्र छिर्न अवरोध हुने गरेको थियो । ‘त्यसैले पहिलो चरणमा अस्पताल लाईन र भुड्कीचोकमा डोजर चलाईएको हो,’ उनले भनिन्, ‘अभियान बिहीबार पनि जारी छ ।’