भैरहवा — रेविजको प्रकोप न्यूनीकरण र छाडा कुकुर नियन्त्रण गर्न आइतबारदेखि भैरहवामा दुई दिने सामुदायिक कुकुर बन्ध्याकरण शिविर सञ्चालन गरिएको छ ।

भेटेरिनरी अस्पताल तथा पशुविज्ञ सेवा केन्द्र रूपन्देहीको आयोजनामा शिविर सञ्चालन भएको हो । कुकुर बन्ध्याकरण गर्न केन्द्रले नेपालगन्जस्थित होराइजन भेटेरिनरीसँग सम्झौता गरेको छ । शिविरमा १ सय ३५ वटा सामुदायिक कुकुरको बन्ध्याकरण गरिने जनाइएको छ । 

भेटेरिनरी अस्पताल तथा पशुविज्ञ सेवा केन्द्र रूपन्देहीका प्रमुख डा.परवेज आलमले रेविज रोग सार्ने र छाडा कुकुरको आतंकलाई नियन्त्रण गर्न त्यस्ता कुकुरको बन्ध्याकरण गरी रेविजको भ्याक्सिन लगाउने गरिएको बताए ।

उनका अनुसार सन् २०३० सम्ममा कुकुरबाट हुने रेविज लाग्ने दरलाई शून्यमा झार्ने विश्वव्यापी अभियानलाई सफल बनाउन एकमात्र प्रभावकारी उपाय कुकुरको बन्ध्याकरण गरी रेविजको क्याक्सिन लगाउनु हो । पशु कल्याण निर्देशिका, २०७३ ले कुनै पनि कुकुर मार्न नपाइने व्यवस्था गरेको छ ।