बुटवल — लुम्बिनी प्रदेशसभाको सातौं अधिवेशनको पाँचौं बैठक आइतबार बस्ने भएको छ । प्रदेशसभाका सचिव दुर्लभकुमार पुनले शुक्रबार सूचना जारी गर्दै बैठक बस्ने जानकारी गराएका हुन् । 

लुम्बिनी प्रदेशसभाको सातौं (हिँउदे) अधिवेशन मंसिर ८ बाट सुरु भएको थियो । मंसिर ८ को पहिलो बैठक शुभकामना आदानप्रदान र प्रदेश प्रमुखका पत्र पढेर सुनाएपछि सकिएको थियो । तर, दोस्रो बैठक बस्न झण्डै साढे २ महिना लाग्यो ।

माघ १३ मा बसेको दोस्रो बैठकमा सरकारका तर्फबाट दलित अधिकार सम्बन्धी विधेयक, जिवनाशक विषादी व्यवस्थापन तथा नियमन गर्ने सम्बन्धी विधेयक र प्रदेश प्रमुखबाट फिर्ता भएको लुम्बिनी अनुसन्धान तथा प्रशिक्षण प्रतिष्ठान सम्बन्धी विधेयक पेश भएको थियो ।

माघ १४ मा बसेको तेस्रो र २० गते बसेको चौंथो बैठकले तीन वटा विधेयकमाथि सैद्धान्तिक छलफल सकेर दफावार छलफलका लागि सम्बन्धित विषयगत समितिमा पठाएका थिए। तीनवटै विधेयक अहिले विषयगत समितिमा छलफलमै छन् । तीबाहेक अन्य विधेयक नभएपछि माघ २० यता थप बैठक बसेका थिएनन् । 

चौंथो बैठक बसेको २ महिनापछि सभामुख तुलाराम घर्ती मगरले प्रदेशसभा नियमावली २०७९ को नियम १२ को उपनियम (३) अनुसार आइतबारका लागि पाँचौं बैठक बस्न लागेको प्रदेशसभाका सचिव दुर्लभकुमार पुनले बताए।

आइतबार बस्ने बैठकको सम्भावित कार्यसूची पनि तय भएको उनले बताए । ‘समसामयिक विषयमा प्रदेशसभा सदस्यहरुले विशेष समयमा बोल्ने, लुम्बिनी प्रज्ञा प्रतिष्ठान स्थापना तथा सञ्चालन गर्न बनेको विधेयक र जिल्ला सभा तथा जिल्ला समन्वय समिति सञ्चालन सम्बन्धी ऐन, २०७५ लाई संशोधन गर्न बनेको विधेयक दफावार छलफलका लागि सम्बन्धित समितिमा पठाइयोस् भनी प्रस्ताव पेश हुने सम्भावित कार्यसूची छ,’ उनले भने, ‘सरकारका तर्फबाट थप विधेयक दर्ता भएमा अर्को बैठकमा पेश हुनेछन् ।’

लुम्बिनी प्रदेश सरकारले ‘विजनेश’ नसकेपछि लुम्बिनी प्रदेशसभा झण्डै एक वर्षदेखि कामविहीन बन्दै आएको छ । विधेयकमाथिको छलफल, पारित, कानुन निर्माण र जनसरोकारका महत्वपूर्ण विषयमा छलफल गर्ने र नीति तयार गर्नुपर्ने मुख्य जिम्मेवारी रहे पनि सरकारकै गति सुस्त भएपछि प्रदेशसभा बेकामे बनेको हो ।