गुल्मी — जिल्लाका आधा परीक्षा केन्द्रमा बिहीबारबाट उत्तरपुस्तिका परीक्षण सुरु भएको छ । माध्यमिक शिक्षा परीक्षा (एसईई) का लागि गुल्मीमा रहेका २६ परीक्षा केन्द्रमध्ये आधामा उत्तरपुस्तिका परीक्षण आजबाटै सुरु भएको हो ।

परीक्षा सकिएको तीन दिनभित्र परीक्षण गरेर सक्न भनिएको निर्देशनअनुसार परीक्षा सकिएकै दिनबाट परीक्षण सुरु भएको शिक्षा विकास तथा समन्वय इकाइ गुल्मीका प्रमुख थानेश्वर घिमिरेले बताए । परीक्षा सकिएकै केहीबेरमा केही विद्यालयमा परीक्षण भएकामा यो संख्या साँझसम्म आधाभन्दा बढीमा पुगेको हो । यसपटक शिक्षा निर्देशिकामार्फत परीक्षा सम्पन्न भएकै केन्द्रमा परीक्षा सकिएको विषय तीन दिनभित्र परीक्षण गर्नुपर्ने भनिएको छ । त्यहीअनुसार काम अगाडि बढेको हो । बाँकी विद्यालयमा शुक्रबार परीक्षण हुनेछ । 

गुल्मीमा १ सय ५१ विद्यालयका ४ हजार ४ सय ५२ जना विद्यार्थी एसईई परीक्षामा सहभागी छन् । यसपटक २६ परीक्षा केन्द्रमार्फत परीक्षा भइरहेको छ । शिक्षा विकास तथा समन्वय इकाइ गुल्मीका अनुसार नियमित साधारणतर्फ ३ हजार ३ सय ४२ र  प्राविधिकतर्फ २ सय ५८ र ग्रेड वृद्धितर्फ८ सय ५१ परीक्षार्थी छन् ।अघिल्लो वर्ष साधारणतर्फ ३ हजार ५ सय २६,  प्राविधिकतर्फ २ सय ६० र ग्रेडवृद्धितर्फ १ हजार ६५ परीक्षार्थी रहेका थिए ।