कपिलवस्तु — महाराजगन्ज नगरपालिकाको बर्गदा गाउँमा शनिबार दिउँसो भएको धार्मिक विवादले तनावग्रस्त बनेको तौलिहवा–बहादुरगन्ज हुलाकी सडक खण्डको जनजीवन सामान्य बन्दै गएको छ । सडकमा भाडाका र निजी सवारी साधन चलेका छन् । सर्वसाधारण सहज रूपमा आवतजावत गरिरहेका छन् । 

घटनापछि निमित्त प्रजिअ भविश्वर घिमिरेले सूचना जारी गर्दै शनिबार दिउँसो २ बजेदेखि अर्को आदेश नभएसम्म महराजगन्ज नगरपालिकाको पूर्व बगर्दी पुल, पश्चिम बहादुरगन्ज चोक, उत्तर महाराजगन्ज बजार र दक्षिण हर्दौनासम्म भेला, सभा, जुलुस र प्रदर्शन गर्न नपाउने गरी निषेधाज्ञा जारी गरेका थिए । निषेधाज्ञाकै बीच विवाद भएको ठाउ बर्गदागाउँभन्दा पश्चिम महाराजगन्ज नगरपालिका–६, जिगना चौराहामा विरोध प्रदर्शन गरिरहेका प्रदर्शनकारी र प्रहरीबीच झडप भएको थियो । प्रदर्शन अनियन्त्रित हुन थालेपछि प्रहरीले गोली चलाएको थियो । हिजोको घटनामा सर्वसाधारण र प्रहरी गरी २३ जना घाइते भएको जिल्ला प्रहरी प्रमुख उपरीक्षक सन्तोष आचार्यले बताए ।