रुकुम पूर्व — रुकुम पूर्वमा निर्वाचन प्रहरीले आफूहरु ठगिएको भन्दै विरोध जनाएका छन् । सम्झौताविपरीत काममा लगाएको, आफ्ना मान्छेलाई नाम मात्रको नियुक्ति दिएको र पोसाकमा गडबडी गरेको उनीहरुको आरोप छ । 

जिल्ला प्रहरी कार्यालयको गेटमा भेला भएर विरोध जनाइरहेका निर्वाचन प्रहरीले डीएसपीले ३ जनालाई आफ्नै मर्जीमा नियुक्त गरी तालिम र ड्युटीमा नलगाएको र केही निर्वाचन प्रहरीलाई सम्झौताविपरीत कार्यालयको भवन निर्माणको काममा समेत लगाएको बताएका छन् ।

निर्वाचन प्रहरी एमबी विकले निर्वाचन तालिमका बेला कार्यालयको छेउमा रहेको ड्युटी पोस्ट निर्माणको काम गर्नुपरेको बताए । ‘हामीलाई खानामा मिलाउँला भनेर निर्माणको काममा लगाइयो । तर अहिले केही वास्तै गरिएन,’ उनले भने । 

यसका साथै उनीहरुले पाएको पोसाक पनि तोकिएको बजेटअनुसार नभएको बताएका छन् । पोसाकबापत ११ हजार ५ सय ७० पाएको र जस्ताको तस्तै फिर्ता गरेको निर्वाचन प्रहरी दीपक केसीको भनाइ छ । ‘तालिमका बेला इन्सपेक्टर सापले हामीलाई पोसाकको ६ हजार लाग्छ भन्नुभएको थियो । तर अहिले पूरै पैसा मागियो,’ उनले भने, ‘पोसाक पनि त गतिलो छैन । यसमा पनि गडबड भएको जस्तो लागेको छ ।’