पाल्पा — आगामी निर्वाचनमा पूर्वखोला गाउँपालिका-६, हेक्लाङस्थित हेक्लाङ स्वास्थ्य चौकीमा मतदान केन्द्र नराख्ने गरी यसपटकलाई स्वास्थ्य चौकीमै मतदान केन्द्र राख्न स्थानीय सहमत भएका छन् । 

सुरक्षा समिति, निर्वाचन अधिकृत, गाउँपालिका अध्यक्ष, वडाध्यक्ष, स्वास्थ्य शाखा प्रमुख, स्थानीय राजनीतिक दलका प्रमुख तथा प्रतिनिधिसहितको सर्वपक्षीय छलफलपछि स्थानीय बासिन्दा सहमतिमा आएका हुन् । उनीहरूले आगामी निर्वाचनमा स्वास्थ्य चौकीमा रहेको मतदानस्थल नजिकैको बालहित प्राथमिक विद्यालयमा स्थानान्तरण गर्नुपर्ने माग राखेका थिए । 

सोमबार मतदान अधिकृतसहित सुरक्षाकर्मी केन्द्रमा पुग्दा उनीहरूले मतदानका सामग्री राख्दा आपत्ति जनाउँदै अवरोध गरेका थिए । लामो छलफलपछि यस पटकलाई स्वास्थ्य चौकीमै मतदान केन्द्र राख्ने सहमति भएको सहायक प्रमुख जिल्ला अधिकारी ऋषिराम सुवेदीले बताए । 

‘गाउँपालिकाले विद्यालयमा केन्द्र राख्नका लागि आवश्यक सहयोग गर्नसमेत तयार भएको छ,’ उनले भने, ‘आगामी दिनमा स्वास्थ्य चौकीमा नराख्ने र यसपटकलाई सुरक्षाका दृष्टिकोणले पनि अब अन्यत्र सार्न समस्या हुने बताएपछि स्थानीय बासिन्दा सहमत हुनुभयो ।’ गाउँपालिका अध्यक्ष नुनबहादुर थापाले आवश्यक सहयोग गर्न आफूहरू सधैं तयार नै रहेको बताए । 

स्थानीयले यसअघि नै निर्वाचन कार्यालयमा स्वास्थ्य चौकीबाट मतदानस्थल र केन्द्र हटाउन निवेदन दिए पनि सुनुवाइ भएको थिएन । स्वास्थ्य चौकीमा रहेको बर्थिङ सेन्टर साथै आपतकालीन सेवाप्रवाहमा कुनै अवरोध नहुने गरी मतदानस्थल सञ्चालन हुने प्रहरी उपरीक्षक दीपेन्द्र थारु पञ्जियारले बताए । मतदान केन्द्रका रूपमा प्रयोग गर्दा स्वास्थ्य सेवामा कुनै पनि असर नपुग्ने गरी सञ्चालन गरिने उनले बताए ।