बर्दिया — भारतसँग जोडिएको गुलरिया नगरपालिका–१० रत्नापुरका बासिन्दा यतिबेला तोरी उखाल्ने, भित्र्याउने काममा व्यस्त छन् ।

प्रतिनिधिसभाको निर्वाचन नजिकिँदै जादा उम्मेदवारहरुले याे बस्तीमा पनि प्रचारप्रसार र भेटघाटलाई तिब्रता दिएका छन् । तर यहाँका मतदाता भने निर्वाचनपछि माग पूरा गर्नु त टाढैको कुरा चुनाव जितेका नेताहरु फर्केर समेत नआउने गरेको गुनासो पोखिरहेका छन् । 

खेतीपाती, दैनिक मजदुरी र वस्तुभाव पालेर जीविका गरिरहेका स्थानीयलाई चुनाव भन्दा गुजाराको चिन्ता छ। फुर्सदको समयमा उनीहरु कसलाई भोट दिए हाम्रो समस्या समाधान हुन्छ भनेर छलफल गरेका हुन्छन् । 
उम्मेदवारहरु यसपाली पनि गाउँका पुरानै मुद्दा अघि सारेर घरदैलो गर्दै आएका छन् । बाढी नियन्त्रण, भत्किएको पुल निर्माण, वन्यजन्तु आतंक नियन्त्रणलगायत रोजगारी दिने पुरानै आश्वासन दिन थालेका छन् ।

तर उम्मेदवारको आश्वासनप्रति मतदाता विश्वास गरिरहेका छैनन् । गुलरिया–१० रत्नापुरका राम सेवक लोध नयाँ र पुरानो दलका नेताहरुले गाउँका सबै समस्या समाधान गरिदिने आश्वासन बाँडिरहेको बताउँछन् । 

यसअघिका निर्वाचनमा पनि यस्तै आश्वासन पाइरहे पनि चुनावपछि कोही फर्केर नआएको उनले गुनासो पोखे। ‘किसानको समस्या, बाढी नियन्त्रण, रोजगारीलगायत आधारभूत समस्याले आक्रान्त रत्नापुरको अवस्था कहाली लाग्दो छ,’ उनले भने, ‘उम्मेदवारको आश्वासन चुनावसम्म भएकोले विश्वास लाग्न छाड्यो ।’