नेपालगन्ज — बाँकेमा प्रतिनिधिसभा निर्वाचनका लागि तोकिएकामध्ये ६१ वटा मतदानस्थल अति संवेदनशील रहेको जनाइएको छ । 

जिल्लाका आठवटा पालिकाका १३९ वटा मतदानस्थलमध्ये ६१ वटा अति संवेदनशील, ५० वटा संवेदनशील मतदानस्थलको रुपमा तोकिएको जिल्ला सुरक्षा समितिका अध्यक्ष प्रमुख जिल्ला अधिकारी दिलबहादुर तामाङले बताए  । उनका अनुसार भारतसँग ६५ किलोमिटरको खुला सिमाना गाँसिएको जिल्लामा थप सतर्कता अपनाइएको छ । 

१३९ मतदानस्थलमा ४०० मतदान केन्द्र कायम गरिएको र केही अस्थायी मतदान केन्द्रसमेत कायम गरिने तयारी रहेको निर्वाचन कार्यालय बाँकेले जनाएको छ । जिल्ला प्रहरी कार्यालय बाँकेका प्रमुख प्रहरी उपरीक्षक अंगुर जिसीले निर्वाचनलाई अत्यन्त मर्यादित र भयरहित तरिकाले सम्पन्न गर्न कडा सुरक्षा व्यवस्था गरिने बताए ।