दाङ — लुम्बिनी प्रदेशको राष्ट्रिय सभा सदस्य निर्वाचन आइतबार घोराहीमा हुँदैछ । निर्वाचनको सम्पूर्ण तयारी पूरा भएको लुम्बनी प्रदेश निर्वाचन कार्यालयले जानकारी दिएको छ ।

घोराहीस्थित कर्मचारी मिलन केन्द्रकमा मतदान गर्ने स्थल तयार भैसकेको छ। मतदानका लागि उम्मेदवारलगायत विभिन्न जिल्लाका पालिका प्रमुख, उपप्रमुख र प्रदेश सांसद्हरु घोराही आउने क्रम सुरु भैसकेको छ । राष्ट्रियसभा सदस्य निर्वाचनका लागि लुम्बिनी प्रदेशबाट आठ जनाको मनोनयन दर्ता भएको छ।

कांग्रेस–एमाले गठबन्धनबाट तीन, नेपाली कम्युनिष्ट पार्टीबाट तीन र राष्ट्रिय जनमोर्चाबाट दुई जनाको उम्मेद्वारी दर्ता भएको थियो । लुम्बिनी प्रदेशबाट महिला, अपांगता/अल्पसंख्यक र अन्य गरी तीन जना सदस्य निर्वाचित हुँदैछन् । जसका लागि कांग्रेस र एमालेले तालमेल गरी उम्मेद्वारी दर्ता गराएका छन् । एमालेको भागमा महिला कोटा परेको थियो भने काँग्रेसलाई अपांग र अन्य समूहबाट परेको थियो । जस अनुसार एमालेबाट मदाने गाउँपालिका–४ गुल्मीकी रामकुमारी झाँक्रीको उम्मेदवारी परेको छ ।

झाँक्री पूर्वसहरी विकास मन्त्री हुन् । उनी एकीकृत समाजवादीको केन्द्रीय सचिव थिइन् । हाल उनी पुनः एमालेमा फर्किएपछि राष्ट्रियसभा सदस्यको उम्मेदवारी बन्ने अवसर पाएकी हुन् । विद्यार्थी आन्दोलनबाट राजनीतिमा स्थापित भएकी झाँक्री अनेरास्ववियूको पूर्व केन्द्रीय अध्यक्ष पनि हुन् ।