आगामी फागुन २१ गते हुने प्रतिनिधिसभा सदस्य निर्वाचनका लागि पाल्पाका दुवै क्षेत्रमा ३३ देखि ६० वर्षभित्रका उम्मेदवार धेरै छन्।
What you should know
पाल्पा — दुई निर्वाचन क्षेत्र रहेको पाल्पामा अधिकांश दलले युवालाई उम्मेदवार बनाएका छन्।
आगामी फागुन २१ गते हुने प्रतिनिधिसभा सदस्य निर्वाचनका लागि ३३ देखि ६० वर्षभित्रका उम्मेदवार धेरै छन्।
क्षेत्र नम्बर १ बाट नेकपा माओवादीबाट उम्मेदवार बनेका ३३ वर्षीय पुरन गैहृे शर्मा छन् । क्षेत्र १ मै स्वतन्त्र उम्मेदवार कोशल अर्याल ३५ वर्षका छन् । कांग्रेसबाट क्षेत्र १ मा उम्मेदवार बनेका सन्दीप राना ३८ वर्षका हुन् भने राष्ट्रिय स्वतन्त्र पार्टीका क्षेत्र १ का उम्मेदवार विमल पन्त ३९ वर्ष पुगे ।
गैहृे शर्मा, अर्याल, पन्त मतदाताबीच नयाँ अनुहार हुन् भने राना यसअघिको निर्वाचनमा समानुपातिक उम्मेदवार थिए ।
क्षेत्र १ मा मंगोल नेसनल अर्गनाइजेसनबाट भलन चिदी मगर र क्षेत्र २ बाट स्वतन्त्र उम्मेदवारी दिएका केशवप्रसाद बस्याल ३९ वर्षका हुन् । सोही क्षेत्रमा नेशनल रिपब्लिक नेपालबाट उम्मेदवार बनेका थमनसिं रेश्मी मगर, राष्ट्रिय जनमोर्चाका बालबहादुर दर्लामी र क्षेत्र २ बाट नेकपा माओवादीबाट उम्मेदवार भएका विष्णु ठडराई (सार्की) पनि ४० वर्षका हुन् ।
क्षेत्र २ बाट सार्वभौम नागरिक पार्टीबाट उम्मेदवार बनेका राम बहादुर अस्लामी ४४ वर्षका छन् भने कांग्रेसबाट क्षेत्र २ मा उम्मेदवार हिमालदत्त श्रेष्ठ ४५ वर्षका भए । क्षेत्र २ कै राष्ट्रिय स्वतन्त्र पार्टीका माधव बहादुर थापा, क्षेत्र १ मा राष्ट्रिय जनमोर्चाबाट उम्मेदवार नरमती सिंजाली र क्षेत्र १ कै स्वतन्त्र उम्मेदवार युद्धबहादुर विरकट्टा पनि ४५ वर्षका छन् ।
क्षेत्र २ का प्रगतिशील लोकतान्त्रिक पार्टीका उम्मेदवार बोधराज ४८ वर्षका भए भने यही क्षेक्रबाट राष्ट्रिय जनमुत्ति पार्टीबाट उम्मेदवार बनेका टोपबहादुर अस्लामी ४९ वर्षका हुन् ।
क्षेत्र १ मै नेपाली कम्युनिष्ट पार्टीबाट उम्मेदवार बनेका हुमबहादुर सुनारी ५४ वर्षका हुन् । क्षेत्र १ बाट राप्रपा उम्मेदवार बृहस्पति अर्याल ५५ वर्षका हुन् भने एमालेबाट क्षेत्र १ का उम्मेदवार नारायण प्रसाद आचार्य ५६ वर्षका भए । आचार्य यसअघि २०७४ मा लुम्बिनी प्रदेशसभा र २०७९ मा प्रतिनिधिसभा सदस्य उम्मेदवार थिए।
क्षेत्र २ मा मंगोल नेशनल अर्गनाइजेशनबाट उम्मेदवार बनेका मानबहादुर दर्लामी ५६ वर्षका हुन्। एमालेबाट क्षेत्र २ मा उम्मेदवार बनेका ठाकुर प्रसाद गैरे ५७ वर्षका भए । गैरे २०७९ मासमेत उम्मेदवार थिए।
क्षेत्र २ मा नेपाल मजदुर किसान पार्टीबाट उम्मेदवार भएका कृष्ण शोभा मुस्याख्व, क्षेत्र २ कै जनता समाजवादी पार्टीबाट उम्मेदवार बनेका खिकबहादुर रेश्मी मगर, क्षेत्र २ कै स्वतन्त्र उम्मेदवार मोहन कुँवर थापा मगर र क्षेत्र १ बाट स्वतन्त्र उम्मेदवारी दिएका बाछा दली मिया ५८ वर्षका हुन् । क्षेत्र नम्बर २ बाट स्वतन्त्र उम्मेदवारी दिएका देवीप्रसाद भण्डारी ६० वर्षका भए भने नेशनल रिपब्लिक नेपालबाट उम्मेदवार बनेका देव प्रसाद श्रेष्ठ ६१ वर्षका भए।
राप्रपा क्षेत्र २ का उम्मेदवार डुलबहादुर कुँवर र क्षेत्र १ का स्वतन्त्र उम्मेदवार डिल्लीराज काफ्ले ६२ वर्षका हुन्। नेपाली कम्युनिष्ट पार्टीका क्षेत्र २ का उम्मेदवार सोमप्रसाद पाण्डेय ७० वर्षका भए। पाण्डेय २०५१, २०५६, २०६४, २०७०, २०७४, २०७९ को प्रतिनिधिसभा सदस्य उम्मेदवार हुन्। उनी २०६४ र २०७९ को निर्वाचनमा पराजित भएका थिए भने बाँकी निर्वाचनमा जित हासिल गरेका थिए।
