लागुऔषध न्यूनीकरणको लागि पुसमा ३५ वटा सचेतनामूलक कार्यक्रमबाट १ हजार ४ सय ९ जना लाभान्वित भएको जिल्ला प्रहरीले जनाएको छ । चालु आर्थिक वर्ष ०८२/०८३ को साउनदेखि हालसम्म लागुऔषधसहित १ सय ३० जनालाई नियन्त्रणमा लिएको जिल्ला प्रहरीको तथ्यांकले देखाएको छ।

लागुऔषध अपराधमा संलग्नलाई सजायको दायरामा ल्याइरहेको प्रहरी उपरीक्षक सरोज पौडेलले बताए। ‘लागुऔषध न्यूनीकरणका लागि प्रहरीले सक्दो काम गरिरहेको छ,’प्रहरी उपरीक्षक पौडेलले भने,‘समयमै सूचना आएमा अपराध कन्ट्रोल गर्न सकिने हुँदा सर्वसाधारणको साथ सहयोगको खाँचो छ ।’ 

आर्थिक वर्ष ०७९/०८० मा ५६, आर्थिक वर्ष ०८०/०८१ मा १ सय २४ र आर्थिक वर्ष ०८१/०८२ मा १ सय ३६ लागुऔषध अपराधका मुद्दा दर्ता भएको जिल्ला प्रहरी कार्यालयको तथ्यांकले देखाएको छ। तथ्यांक अनुसार जिल्लामा लागुऔषध अपराधको मुद्दा प्रत्येक बढ्दो रहेको छ। सिमावर्ती भारतीय बजारमा लागुऔषध सहजै पाइने भएकोले न्यूनीकरणमा चुनौती देखिएको छ।