बर्दिया — पुस १ गतेबाट बाक्लो हुस्सु, शीतलहर र चिसो हावाले बर्दियाको जनजीवन कष्टकर बन्दै गएको छ । बिहानैदेखि अत्यधिक चिसो हावा चलेपछि जनजीवन प्रभावित बन्दै गएको हो । अहिले साँझ–बिहान मानिसको चहलपहल सडकमा देखिन छोडेको छ । सडक सुनसान देखिन थालेका छन् ।

पुस महिनायता एक दिन मात्र मधुरो घाम देखिए पनि त्यसपछि घाम देखिएको छैन । कपडा धोएर सुकाउँदा करिब ४/५ दिनमा सुक्ने गरेको मधुवन नगरपालिका–५ की नन्दकला खत्रीले बताइन् ।

बूढापाकाका अनुसार यति लामो शीतलहर र घाम नलागेको अनुभव यसअघि कमै गर्नुपरेको थियो । बढैयाताल गाउँपालिका–१ का ७० वर्षीय राम दुलारे थारुले २२ वर्षअघि १५ दिनसम्म चिसो र हुस्सुले सताएको अनुभव सुनाए । ‘त्यसयता अहिले यति धेरै चिसो भयो,’ उनले भने, ‘चिसो बढ्दै जाँदा निकै कष्ट भइरहेको छ ।’

पालिकाहरूले विपन्न परिवारलाई न्याना कपडा र दाउरा वितरण गरेका छन् । गुलरिया नगरपालिकाका प्रमुख मुक्तिनाथ यादवले विपन्न परिवारलाई कम्बल, न्याना कपडा र दाउरा वितरण गरिरहेको बताए । चिसो बढ्दै गए सर्वसाधारणका लागि चोकचोकमा थप दाउरा वितरण गर्ने उनले जनाए ।